Ka Farmers Parliament ka dei ka jingithuh ia ka jingtrei jong ki nongrep: CM

Syllad | The Rising MeghalayaDecember 4, 2023

Ka jingpynlong ia ka ‘Farmers Parliament’ ka dei shibynta kum ka jingithuh ia ka jingtrei jong ki paid nongrep, ong u Myntri Rangbah ka jylla u Conrad K Sangma haba aijingkren ha ka “3rd Meghalaya Farmers’ Parliament” ba la pynlong hynne ka sngi Nyngkong hapoh State Convention Centre, Shillong shibynta ka jingrakhe ia ka sngi jong ki nongrep ne ‘Farmers’ Day.’

U CM u la ong ruh ba kane ka prokram ka dei kaba kongsan ban ithuh ia ka jingtrei ka jong ki bad ban kyrshan ia ki, bad ka dei ruh ka khubor kaba pynpaw ba ka sorkar ka ia don ryngkat lang bad ki khnang ba kin lah ban kyntiew ia ka rep ka riang bad ka ioh ka kot.

Ha kane ka prokram la ia don lang ruh u Myntri ka Tnat Animal Husbandry & Veterinary u Bah AL Hek bad ka Myntri ka Tnat ka rep ka riang ka Kong Ampareen Lyngdoh nalor kiwei pat.

U Conrad u la ong ruh ba ki nongrep ki la dep lypa ban pynbunkam ha kiba bun ki bynta jong ka rep ka riang bad ba ka jingdonkam jingiarap ka long tang khyndiat eh ha  kaba iadei bad ki jaka buh ia mi mar rep, ha ka liang ka jingpynpoi mar, ki lad jingiarap pisa bad ka jingpyntreikam ia ki polisi ki ban nanglah ban kyntiew shuh shuh ia ka rep ka riang.

Nalor kata u Myntri u la bynrap ruh ba ka Regeneration Meghalaya program, kaba dei ka agroforestry project kaba u la plie dang shen ka dei tang ka bynta jong kane ka thong kaba khraw. “Lyngba kane bad kiwei pat ki sienjam lyngba ki Tnat sorkar bapher bapher, ka jylla ka la dep lypa ban sdang ban pyni ia ka lynti,” u la ong. Watla katta u la ong ba ka long kaba donkam ban iakynduh bad ban iakhun ia ki jingeh kiba iadei ha ka rep ka riang.

Na ka liang u CM ka jylla u kyrmen ruh ba kane ka jingialang ba ar sngi kan plie ia ka rynsan na ka bynta ki nongrep ba kin iamir jingmut halor kiba bun ki mat, ban shim ia ki sienjam kiba lah ban kyntiew shuh shuh ia ka kam rep lyngba ka jingpyrshang ia ki rukom rep barim bajah.

“Shuh shuh u la ong ruh na ka bynta kino kino ki prokram ba kin long kiba seisoh ka donkam ia ka jingiashim bynta lang da ka imlang ka sahlang, kata da kaba kyntu ruh ia ki kynhun jong ka Regeneration Meghalaya project ban pyniasoh bad ki nongshong shnong naduh ka tyllong na ka bynta ban lah ban pynseisoh ia kane ka prokram.

“Ha ka jingrakhe ia kane ka sngi jong ki nognrep, ngi ai ka jingithuh ba sngew burom ia ka jingnoh synniang ba kongsan jong ki 4.5 lak tylli ki nongiing jong ki nongrep nas ka bynta ka roi ka par ha ka jylla,” ong u Conrad Sangma.

Ha kane ka prokram u CM u la sam ruh ia ki cheque sha ki nongioh jingmyntoi lyngba ka FOCUS bad PES kumjuh iak i nongioh jingmyntoi lyngba ka Piggery Mission. Shibynta jong kane ka jingrakhe u CM u la plie ruh ia ki 11 tylli ki karkhana ban song bad pynkhreh ia ki mar rep bad ia sawtylli ki jaka buh mar sha ki thain kiba kham pajih.