Ka Gaddez Salon: Ka jaka khapshniuh & pynbha briew iaki kynthei shynrang ha Khliehriat

Syllad | The Rising MeghalayaSeptember 6, 2022

Wat la ka kam khapsniuh bad ka kam pynbha briew ka dei ka kharkhana kaba lah ban aikam aijam, hynrei ha ka thain Khasi Jaintia kane ka kam hi dang pyniaid ki briew ki bym dei ki trai jylla.

Pynban ka khubor kaba wanlam sngewtynnad ka dei ka jingplie uwei u samla ia ka Gaddez Salon- Get Styled kaba iahap kyrdan bad kiwei pat ki dukan baheh kaba la biang lut nadong shadong naduh ka jingbuh ryntih iaki kamra ban khapsniuh bad pynbha briew.

Kane ka Gaddez Salon kadei kaba dei trai da u samla Fourming Siangshai uba na Khliehriat, East Jaintia Hills District.

La plie paidbah ia kane ka salon da kiar ngut ki samla ba kynthup iaka Sookini Sutnga ka Model ba juh leit shim bynta haki rynsan bapher wat shabar ka Jylla bad  Deikisha Talang ka Model ha kajuh ka por ka Actress ba ak haka phlim Ahor kaba ynsa pynmih shem. La iadonlang ruh u MLA ka Khliehriat u Kyrmen Shylla bad kiwei.

Ka por plie kane ka jaka pynbha briew ka long naduh sngi Nyngkong haduh Saitjain bad ki paidbah ki lah ban ioh ka jingshakri katkum ka jingkwah jongki kynthup naduh ka Bleach, Skin Care, Threading, Waxing Regular, Waxing Premium, Hands & Feet, Hair Care, Hair Smoothing, Hair Treatment bad kiwei ba dei naka bynta ki shynrang.

Iaka jingialang plie la pyniaid da u Goldenstar Suchiang.

Ka Sookini Sutnga ka iaroh ia u Fourming Siangshai uba sdang ia kum kane ka Salon ka bym pat don hapoh ka thaiñ bad ka ban pynsuk iaki briew ba juh leit shaki salon ba kum kane, ha kajuh ka por ka ai kam ai jam ruh iaki samla.

Naka liang u Kyrmen Shylla u ngeit skhem ba ka jingplie ia kane ka Salon ki samla, ki longkmie longkpa ba ju angnud baroh shi katto kila iohlad namar ba kala don hajan, wym shuh kum mynshwa watla ki kwah leit ruh ka jngai.

“Kum ki briew ha pyrthei nalor ba ngi hap banlong phikir haka bam ka dih ban ioh iaka met kaba koit ka khiah, ka jingsumar ban bhabriew, ban wan dur ka met ka phad ruh ka long hi kaba donkam”. Ong u Kyrmen Shylla.

Ula bynrap ruh ba ka jingsumar ialade ban neh ka jingbhabriew ka jingitynnad wat hadien bala ioh khun ioh kti ruh, ka iarap ban pynkhlaiñ ka jingiadei hapdeng shilok ban neh ka jingiaieid.