Ka HANM kam don bynta bad ka jingkam president ki arngut haka AJCCTA

Syllad | The Rising MeghalayaOctober 24, 2021

Ka Hynniewtrep Achik National Movement (HANM), Jaintia Zone kala pynshai paidbah ba kam don bynta eiei halor ka jingmih ar kynhun ka All Jaintia Cement and Clinker Transporters, Association (AJCCTA) naka kam president kaba kam markylliang hapdeng u Balen Thubru bad u Kyrshan Dkhar secretary barim.

Ka HANM, Jaintia Zone lyngba u Pynshngain Papang, Working President HANM Jaintia Zone, ula ong ba kila leit sha ka jingialang kum ki trai trok kiba kit ba bah mar na ki karkhana dewbilat bad hadien ba la shem jingeh ban ioh kit mar na ki karkhana kila leit sha ka jingialang ka AJCCTA kaba la jied pynban iaki nongkitkam haka 19 tarik une u bnai.

Ula ong ba ha kane ka jingialang la jied ia u kum u vice president, hynrei hadien bala don ka jingiakam markylliang ia ka kam president hapdeng u ma Balen bad u Kyrshan um lah ban shimti ia kane ka kam tad haduh ba kine ki arliang mamla kin poi sha ka jingsngewthuh jingmut.

Na kaliang u Pynshngain ula kyntu ia kine ki ar ngut ban poi sha ka jingsngewthuh jingmut khnang ba ki trai trok trai jylla kiba kit bah dewbilat naka karkhana kin nym shah iuhroit bad ula ong ba u kloi ban iatreilang bad uno uno lada dei u ma Kyrshan Dkhar ne u Balen Thubru.

Halor ka jingkynnoh u Balen Thubru ba kadon eiei halor ka jingwan jingialang ki dkhot ka HANM bad kiba la shah jied kum ki nongialam ka AJCCTA, ka HANM kala maham um dei bad kynnoh klumar iaka kyrteng jong ka seng HANM namar ka jingleit sha katei ka jingialang ka dei ka kam shimet kamdei ka kam seng.

Ka HANM ka maham ïa kino kino ki briew ba kim dei ban shu kynthoh klumar ïaka kyrteng jong ka HANM khlem da don ki sakhi satar ba biang namar bun ki dkhot jong ka HANM ki don ïaki trok bad ki don ka hok ban ïa shim bynta haka jingïalang jong kino kino ki jingialang jong ki trai trok ha kaba ïa dei bad ka kit ka bah kaba ki ïakynduh jingeh naka por sha ka por.