Ka HSPDP kan wanrah ka jingpynkylla ha ka Khasi Lineage Act lada ioh ha ka bor ha KHADC: Starfing

Syllad | The Rising MeghalayaJanuary 29, 2025

U kyrtong ka Hill State People’s Democratic Party (HSPDP) na Mawsynram constitunecy u Bah Starfing Pdahkasiej ha ka 28 tarik Kyllalyngkot u la pynthikna ba ka party kan wanrah ki jingpynkylla ha ka Khasi Hills Autonomous District (Social Custom of Lineage) (Amendment) Act, 2023 lada kan wan ha ka bor khnang ban pynthikna ba kan ym don ka jingshah pynbor ban register ia ki kur jong ki riewlum.

U la ong ruh ba ka party kan pynthikna ruh ba 28 tylli ki Hima ha kaba hynriew na ki, kiba don ha Mawsynram kin don la ki jong ki ain.

Haba kren sha ki lad pathai khubor hadien ba la pyndep ia ka jingthep kyrteng ha ophis ka Dy. Commissioner, East Khasi Hills, u Bah Starfing uba dei ruh u nongthoh khubor ba la rim bha u la ong ba kane ka dei ka sien kaba nyngkong ba u la iakhun ia ka elekshon ADC hadien ba u la iakhun ha ki elekshon MLA la bunsien ha ki snem kiba la dep.

Da kaba pynpaw ba ka elekshon MDC ka long kaba kongsan bha, une u kyrtong ka HSPDP u la ong, “Namar ba ka KHADC ka iadei bad ki riti ki dustur bad ka bynta ka jong ka ban pynneh pynsah, ban kyntiew bad ban iada ia ki. Kumta, nga la shim ia ka rai ban iakhun ia ka elekshon ban pynthikna ba ki HIma kin don la ki jong ki ain.”

Nalor kata u la ong ba ki don 54 tylli ki HIma ha kaba 22 tylli ki dei kiba la pynbeit ryntih ia ki ain riti dustur bad mynta ki don la ki jong ki ain, sawtylli mynta ki dang ap ia ka jingmynjur jong u Lat, bad 28 tylli ki dang hap ban don la ki jong ki ain.

“Hapoh Mawsynram constituency, ki don hynriew tylli ki HIma kiba dang hap ban don la ka jong ka Act bad kine ki long ka Nongshluit Sirdarship, Sinai Sirdarship, Synnei Sirdarship, Mawsynram Syiemship bad ka Malai-Sohmat Syiemship.Lada ngan shah jied kum u MDC, nga pynthikna ban iatreilang bad baroh ki hynriew Hima ban pynthikna ba kin don la ki jong ki jong ki ain namar khlem ki ain kiba biang kan ktah jur ia ka jingsynshar jong kine ki HIma,” u la bynrap.

Kumta u la ong ba ka dei ka kamram jong ka KHADC bad ruh kumjuh ki MDC ba la jied ban iarap ia baroh ki 28 tylli ki Hima ba kin don la ki jong ki jong ki ain.

Shuh shuh, u Bah Pdahkasiej u la pynthikna ruh ba ka HSPDP kan wanrah ia ki jingpynkylla kiba donkam ha ka ain KHAD (Social Custom of Lineage) (Amendment) Act, 2023 lada kin ioh ha ka bor.