Ka HUCC ka lahduh haka U-15 T20 Cricket ka AJCA, sam tiar ialehkai sha ka Chutwakhu Umshangiar bad Ummulong

Syllad | The Rising MeghalayaFebruary 10, 2022

Ka HUCC kala iohrah iaka nam lahduh hadien ba kala pynliem da 41 run iaka Ummulong Sc haka final jong ka lympung ïalehkai Under-15 Boys T20 Cricket League ba la pynïaid da ka All Jaintia Cricket Association (AJCA) kaba long ha madan Jrisalein ha Chutwakhu, Jowai haka sngi Balang.

Ha kane ka jingiakhun ka HUCC kala jop iaka jingkynting pisa ne ka toss bad kala kamtrai ban tied shuwa bad kala kamai 102 run bad hap lut baroh 10 wicket na ka 19.5 over.

U Wanso Lamare ula lah ban kamai 30 run katba u Maremdor Sutnga ula kamai 18 run. Na ka liang ka Ummulong Sports Club u Balajied Lamare ula ïoh ban pynhap 3 wickets na ki 4 over.

Haba beh ïaka thong ka Ummulong Sports club ka la kamai tang 61 run naka 12 overs bad hap lut baroh ki wicket.

Ïaka nam “Man of the Match” la ïoh rah da u Maremdor Sutnga jong ka HUCC uba la ïoh kamai 18 run bad khur 2 wicket bad ïaka khusnam la sam da u Secretary AJCA u Waiborlang Sohlang. Ia ka khusnam “Man of the series” ruh la ïoh da u Maremdor Sutnga uba la ïoh 77 run ha kane ka tournament bad pynhap 13 wickets na ki 3 tylli ki jingïakhun (matches) bad ïaka khusnam la sam da u Daniel Dan.

Ïaka khusnam ‘Runners up’ la sam da u President Edystone Shylla bad ïaka khusnam sha ka kynhun lahduh la sam da u Philander Lyngdoh.

Shuwa ka jingiakhun final kala don ka jingialang kaba lyngkot ba pynïaid da u Arwotki Sumer Vice president AJCA haka jingïadonlang u kongsan u Philander Lyngdoh Waheh shnong Chutwakhu, u President AJCA u Edystone Shylla bad ki dkhot nongkitkam ka AJCA.

U Edystone Shylla ula iathuh ba kane kadei ka sien kaba nyngkong ba la ka AJCA ka pynïaid ïaka lympung na bynta ki khynnah kiba hapoh 15 snem rta.

Ula iathuh ruh haka jingialang bai a ka madan ialehkai ka synjuk kaba la tei ha Ummulong kala iaid shait shait bad la khmih lynti ba ha u snem ban wan yn ioh ban sdang aiki jingialehkai ha kane ka madan ialehkai cricket kaba pura.

U Philander Lyngdoh haba kren ula ong ka jingdon jong ka AJCA ka long ka jingkyrkhu ïaki riew don sap haka kam ïalehkai ba kin lah ban ieng hala ki jong ki kjat. Ula kyntu ïaki khynnah ban nangtrei shitom khnang ba kin ïoh ïashim bynta haka jingïalehkai Cricket ymtang haka Jylla hynrei haka ri bad wat shabar ri kumjuh.

Ha kane ka sngi ka AJCA kala sam ruh iaki tiar ialehkai cricket sha ka shnong Chutwakhu,  Umshangiar bad ka Ummulong Sports club.

Hadien ka jingïalang la ïoh ki kyntien khublei na u Daowan Nartiang Tournament Secretary AJCA.