Ka iadur masi ha Elaka Raliang ka dei ka jinghikai u barim: Dolloi

Syllad | The Rising MeghalayaJuly 31, 2023

U Dolloi ka Elaka Raliang u ma Chawas Lyngdoh ula ong ba ka iadaw masi rong ne ka iadur masi kaba pynlong manla ka snem ka dei ka jinghikai uba rim hadien bala dep ban bet ia u symbai sha ki hali ki pynthor.

U Dolloi ula ong ia kane haba kren haka iadaw masi rong kaba la pynlong da ka Raliang Elaka Arts & Cultural Organisation ha madan Pamsna, Laskein, West Jaintia Hills District haka sngi Saitjain.

Ula ong shuh shuh “U barim ha ki por mynshuwa ban pynbyrngia ia u khun u riot ka elaka Raliang kila pynlong ia kane ka tamasa iadaw masi rong kum shibynta ka jingiakynduhlang ha kane ka jaka. La ngeit ruh ba kat uba jop u kba u khaw un bha sha kata ka liang kata hadpeng ka madan nein bad madan wah.”

Ula ong ba nalor ka iadaw masi ka don ka jingiatan tyllai ban pyni bor, ha kaba haka por mynshuwa ka phutbol kam pat da paw, hynrei ha kine sngi kum u dolloi ka elaka daka jingrai lang ka dorbar la pynlong ruh wat iaka jingialehkai football kaba shisngi.

Kumta ban pynneh ia kane ka jinghikai u barim watla ha kine ki sngi ruh ka elaka Raliang ka iai bteng ban pynlong ia kane ka tamasa ba shisngi ban iakynduhlang u khun u raiot ka Elaka ha kawei ka jaka, la ong u Ma Chawas.

Hashwa ban sdang ka Iadaw masi, u Dolloi, Pator, Ynniaw Waheh, Wasan shnong ryngkat ki waheh shnong na ki shnong bapher bapher ka Elaka, ki la ai nguh ia u nongbuh nongthaw ryngkat ka suit ka shor da ka “Pyrnah” ba un kyrkhu kyrdoh iaki khun ki hajar ka Elaka ha ka koit ka khiah, ka kamai ka kajih bad ban bha u kba u khaw.

Hadien ka suit ka shor kiba paidbah na kylleng ki shnong kum ka Mulieh, Iawthymme, Mowkyndeng-Madankynsaw, Mulum, Madanrwan, Pohkseh, Laskein, Rtiang bad Raliang kila ialam ia ki masi jong ki ban iadur ban pynbyrngia ia u paidbah uba la ieng sakhi na baroh sawdong ka madan.

Ha kane ka tamasa ym tang ba la pyniadur ia ki masi kyrtong kiba kynsai jong katei thain, hynrei la pynlong ruh ia ka jingialehkai kiba kynthup ia ka Iatan tyllai kaba mar 10 ngut shiliang, ka jingiakop mareh thong bad kiwei kiwei ki jait jingpynbyrnia.

Hadien ki jingialehkai, ka Raliang Elaka Arts & Cultural Organisation kala pynkup burom ia ki khynnah kiba pass bha haka kyrdan SSLC bad HSSLC Examination 2023.

Ia kane ka tamasa la wan sakhi lang da u kongsan u B Niang, Block Development Officer, Laskein C&RD Block haka jingdonlang u Dolloi ka Elaka Jowai u Puramon Kynjing nalor u Dolloi Raliang, ki nongialam shnong ka Elaka Raliang bad kiwei kiwei.