Ka ïew ki nongrep ha Jowai, yn die iaki mar rep khlem khleh dawai sboh

Syllad | The Rising MeghalayaMay 16, 2019

JOWAI: Sa shisien ka seng Society for Urban and Rural Empowerment (SURE) ha ryngkat ka jingïatreilang bad ka North East Slow Food and Agrobiodiversity Society kan pynlong ïaka ïew ki nongrep ha ka 18 tarik une u bnai ha phyllaw ka skul H.K. Singh School, Pohsawiar, Jowai. Kane ka ïew ka sdang naduh ka por 9 baje mynstep.

Ha kane ka ïew yn die tang ïa ki jait jhur kiba rep khlem pyndonkam dawai ne sboh dawai bad kumjuh ruh ki jhur bad ki sohkhlaw.

Ki nongrep kiba la kyrshan da ka SURE kum ki Participatory Guarantee Scheme kin wan rah ïa ki jingbam kiba ki la rep bad la pynmih dalade hi. Kin don ruh kin jingbam tynrai kiba ki nongrep ki shet hi ha kane ka sngi bad kumjuh ruh ki jingbam kiba la shna na ki soh ki pai kiba mih sha kine hi ki thaiñ.

Ka Kong Pasqualina Lamare kaba long Program Associate jong kane ka porkam kala ong “ba kane ka long kum shibynta ban pynshlur ïa ki nongrep jong ngi kiba rep tynrai bad kumjuh ruh ban hikai ïa ki nongshong shnong ba kin bam ki jingbam ba tei met da kaba pyndonkam da ki jingbam tynrai.

Ka kong Lamare kala ong ruh ba ka jingangnud jong ka seng ka long ban pynlong thikna ïa ki ïew kiba kum kine khnang ba ki nongrep kin ïoh jingmyntoi, kumta kala kyrpad ïa ki nongshong shnong ban wan kyrshan ïa ki nongrep kiba rep khlem pyndonkam dawai ne da kaba rep tynrai.