Ka international football match ka India ha Shillong kan iaid beit kumba la pynkhreh: MFA

Syllad | The Rising MeghalayaMarch 4, 2025

Ka Meghalaya Football Association (MFA) ka dang bteng ban trei borbah ban pynbit pynbiang ia ki jingdonkam jong ka JN Stadium, Polo bad kumjuh ka madan kilan kaba don ha NEHU, kum shi bynta ka jingpdiang ka jong ka ia ki artylli ki international match katta kawei ka dei ka jingialehkai paralok pyrshah ia ka Maldives kaban long ha ka 19 tarik bud pat sa ka jingiakhun kaba dei jong ka AFC Asian Cup 2027 qualifier pyrshah ia ka Bangladesh kaban long ha ka 25 tarik mynta u bnai Lber.

Kane kan dei ka sien ba nyngkong ba ka jylla kan ioh ia kat kane ka kabu ksiar ban pynlong ia kum kine ki jingialehkai hangne ha nongbah Shillong, kaba long da shisha ka jingsarong ia ka jylla bad katno tam lei lei ia ki paidbah kiba ieit phutbol.

Haba iadei bad kane u Vice President bad u Secretary ka MFA u bah Cliff R Nongrum bad u bah Sunesh M Syiem, ki pynshai ba ka jingialehkai paralok hapdeng ka India pyrshah ia ka Maldives kan long beit kumba la pynbna ia ka naduh ka sngi kaba nyngkong.

Kane ka jinglong jong kine ki nongialam ka MFA, ka long ban pynshai ia kawei ka khubor kaba la mih ba ka Maldives ka la pyntip ba kan ym lah ban wan ban ialehkai.

“Ngi kyndit bad sah lyngngoh haba ngi shem bad iohi ia kum kane ka khubor, namar na ka liang jong ka AIFF kam shim la pyntip ne ong eiei ia ngi halor jong kane, bad tang mynta ka sngi, ngi dang ioh pdiang ia ka kyrwoh lyngba ka mail na ka AIFF ba pyntip ba ka la phah ruh ia u Match Commissioner naka bynta kane ka jingiakhun pyrshah ka India ia ka Maldives kaban wan poi noh ar shwa jong kane ka jingiakhun” la pynpaw bah Cliff bad bah Sunesh.

Kum ban shu pynkynmaw ba shwa ba ka nongbah Shillong khamtam ka JN Stadium kan ioh ia kane ka jingbit, ka la don shwa ka jingwan jurip da u dkhot ka AFC u Mindu Dorjee ne wat u Mahesh Gawali ba dei u Assistant Coach jong ka India u la wan jurip da lade shisien khnang ban pyntikna ia kine ki artylli ki jingiakhun jong ka India.

Shuh shuh na ka liang bah Cliff u la pynpaw ba ka madan ia kilan kaba la don ha NEHU, ka kam hi ka la iaid shakhmat, khnang ba ki team ki lah ban ia kilan ha kane ka jaka, bad ba dang ap ia kawei ka machine ba kan wan poi naka bynta ban pynbeit ryntih ia ka madan  baroh kawei.

Haba batai kham bniah shaphang kane ka jingioh ban pynlong ia kine ki artylli ki jingialehkai, u bah Sunesh u la kam ba ka daw bah ba pynlong ia ka AIFF ba kan tyrwa sha ka MFA ban pynlong ia kine ki jingiakhun ka dei hadien ba ka la shem bad iohi ia ka jinglah ban ioh ban pynlong ia ki kato katne ki jingiakhun kiba dei jong ka lympung ialehkai ka Durand Cup, nangta sa ka mynsiem ieit phutbol ki briew ka jylla bad ka jinglah na ka liang ka sorkar ban pynbit pynbiang ia baroh ki jingdonkam, ki long da shisha ki daw kiba pynshon jingmut ia ka AIFF ban tyrwa sha ka MFA  ba mynta ka kynti ban pynlong ia kine ki artylli ki jingiakhun.

Na ka liang bah Cliff bad bah Sunesh ki sngew ba ka jingioh ban pynlong ia kine ki artylli ki jingiakhun khlem pep kan ai mynsiem biang ia ki samla ialehkai ba dang khie dang san jong ka jylla.

“Ngi kwah ban pyntip hangne ba ka kynhun ialehkai ka India kin wan ban ia kilan kumba artaiew hangne ha nongbah, ha kaba ngi kyrmen ba kane kan plie ia katta ka lad ne ka kabu ksiar ia ki samla ialehkai phutbol jong ngi kynthei bad shynrang ba kin ioh ban ia kynduh markhmat bad kiwei pat ki samla ialehkai ba la mih na kiwei pat ki shlem ialehkai kiba don ha ka ri” la bynrap u bah Sunesh.