Yn kynthup lang ia ka JHADC haka kylla kaba ar ka kam pynbeit pud Assam Meghalaya

Syllad | The Rising MeghalayaAugust 23, 2022

U Myntri Rangbah ka Jylla u Conrad K Sangma haka sngi Nyngkong ula pynbna ba yn kynthup lang iaka Jaintia Hills Autonomous District Council (JHADC) haka kylla kaba ar ka jingiapynbeit pud hadpeng ka Assam bad ka Meghalaya hapoh ka Regional Committee jong ka West Jaintia Hills District na bynta ka Khanduli-Psiar bad ka Block-I.

U Myntri Rangbah ka Jylla ula ong ia kane ha ka jingialang paidbah kaba la pynlong da ka NPP West Jaintia Hills District ha Madan Khmut Wasain, Mowkaiaw.

U Sangma u la kular ba ka Sorkar kan thaw ki lad ki lynti ban pynbeit ia ki kam pud kam sam na bynta ki hynriew tylli ki jaka kajia khappud kiba dang sah kiba kynthup ia ka Block-I & II, Khanduli-Psiar, Langpih bad kiwei kiwei, kaba ym pat don kawei ruh ka sorkar kaba shim iaka kane ka ishu kaba sahteng mynta 50 snem.

Lah ban kdew hangne ba u Myntri Rangbah ka jylla Meghalaya u la iakynduh ia u Myntri Rangbah ka jylla Assam u Himanta Biswa Sarma ha Guwahati ha ka Sngi U Blei ha ka jingdon lang ki Chief Secretary jong baroh artylli ki jylla bad kiwei de ki heh sorkar.

Ka jingialang ka la mynjur ban sdang ia ka Second Phase ne kylla ba ar ban pynbeit pud pynbeit sam na bynta ki hynriew tylli ki jaka kajia kiba dang sah da kaba shna noh ia ka Regional Committee hapoh 15 sngi.

Ka jingialang ka la rai ruh ba ki Myntri Rangbah jong ka Meghalaya bad ka Assam kin leit iuh kjat sha ki thain Block-I & II ban sngap iaka sur u paidbah.

Ula ong ba Karbi Anglong Autonomous Council (KAAC) ha kane ka kylla ne a wat kaba ar ne ka don ka bynta kaba khraw bha na bynta ka Block-I & II bad Khanduli-Psiar.