Ka JHADC ka dang dei ban ioh haduh 113 klur tyngka kum khajna mar poh khyndew na Sorkar Jylla: Shiwat

Syllad | The Rising MeghalayaNovember 8, 2024

U Chief Executive Member jong ka Jaintia Hills Autonomous District Council (JHADC) u Ma Thombor Shiwat ula iathuh ba ka Council ka dang dei ban ioh haduh 113 klur na ka sorkar jylla kum ka bhah khajna jong ki mar pohkhyndew ba rem dor bad jem dor ne ki major mineral bad minor mineral.

U Ma Shiwat u la iathuh ia kane haba jubab ia ka jingkylli bala wanrah da u MDC jong ka Jowai North u Ma Brigntstar Chyrmang ha Dorbar Tlang jong ka JHADC haka 7 tarik Naiwieng.

U Chief Executive Member u la iathuh ba ka Council ka la ioh 86.63 klur tyngka kum ka bhah khajna jong u major mineral bad 29.94 klur tyngka kum ka bhah khajna jong u minor minerals na ka Sorkar Jylla naduh ka 1 tarik u bnai Iaiong 2023 had 30 tarik bnai Nailur 2024 bad na katei ka pisa bala ioh na ka Sorkar Jylla, ka Council ka la ioh ban siew tulop ia ki MDC bad nongtrei haduh u bnai Nohprah 2023.

U Ma Shiwat u la iathuh ba ka Council ka dei ban ioh haduh 32.89 klur tyngka kum ka khajna jong ka major minerals jong u snem 2023-2024 bad 57.68 klur tyngka jong u snem 2024-2025 bad shuh shuh 9.87 klur tyngka kum ka bhah khajna jong ka minor mineral jong u snem 2023-2024 bad 11.74 klur tyngka jong u snem 2024-2025.

Haba jubab pat ia ka jingkylli bala wanrah da ka MDC jong u Raliang MDC u Ma Robinus Syngkon halor ka jingioh bhah naka jingregister iaki kali da ka tnat Transport, u Ma Shiwat u la iathih ka Council ka la ioh haduh 8.87 klur tyngka kum ka khajna naduh u snem 20230-2024.

U Ma Robinus ula pynpaw ia ka jingsngewkhia jong u halor ka jingioh duna palat ka bhah khajna na ka tnat Transport bad u la buh jingkylli katno tylli ki kali la register ha Ri Lum Jaintia.

U Chief Executive Member u la jubab ba ka Sorkar Jylla kam ju ai kano kano ka kaiphot halor katno tylli ki kali la register ha ka shi snem haduh mynta haba pyllait ia ka bhah khajna sha ka JHADC.