Ka JHADC kan khot tender biang iaki khyrdop check point

Syllad | The Rising MeghalayaApril 28, 2021

U Executive EM incharge Trade u Winning G Sungoh ula ïathuh ba ka konsil kan khot tender biang sa shisien na ka bynta ka Dawki bad ka Mookyndur Check Point hadien bym biang ki kot ki sla ki nongthep tender.

Ula ong ba iaka check point ha Sunapyrdi pat la dep khot tender bad la pdiang ia nongthep tender haka dor kaba T.38 lak shi snem.

“Ïaki artylli ki check point ka Mookyndur bad Dawki ia mynta shipor yn pyniaid hi ka konsil tad haduh la dep ban khot iaka tender,” ong u u EM incharge.

Shuh shuh ka Hynniewtrep Integrated Territorial Organisation (HITO) haka sngi Balang kala leit ban ai dorkhat ha u Chief Executive Member (CEM), Jaintia Hills Autonomous District Council (JHADC) ma Thombor Shiwat haka jingiadonlang u EM inchangre Trade ka JHADC ban dawa pyniaid hi ia kine ki khyrdop da ka konsil.

U president ka HITO, u Donbok Dkhar, ula ong ba kine ki khyrdop kim wanrah jingmyntoi ïaka konsil lada pyniaid da ki riew shimet, hynrei kin long pynban ka khyrdop kaba pynmyntoi tang ïaki katto katne ngut ki nongïalam ka konsil ki bym pyrkhat shuh ïaka lawei jong ka JHADC.

La kynnoh ruh ba ki nongpynïaid iaki khyrdop kim lah ban ai jingkheiñ da kaba biang sha ka konsil kat kumba dei ban ai. Ka HITO ka la kyntu ïa u CEM ba ïaki khyrdop ymdei shuh ban ai sha ki riew shimet hynrei ban pynïaid hi daka konsil khnang ban lah ban tehlakam ïaka jinghiran pisa jong ka konsil.

U CEM JHADC u ma Thombor Shiwat, ula ong kane ka jingdawa jong ka HITO ka konsil kan shnong pyrkhat bad ia mynta hi ka konsil ka khot da ka tender bad ki don bun ki kyndon kiba ki nongshim wai ki hap ban bud ryngkhi ban khanglad iaki jingkhaii beain ki bar jylla.