Ka JHADC kan nym ai NOC shuh iaki kharkhana ong u CEM iaka MPUF

Syllad | The Rising MeghalayaAugust 4, 2020

U Chief Executive Member (CEM) jong ka Jaintia Hills Autonomous District Council (JHADC) ma Thombor Shiwat ula kular ha khmat ki nongialam ka Meghalaya People United Front (MPUF), East Jaintia Hills Unit ba nangne shakhmat ka Executive Committee kaba u ialam kan nym ai NOC shuh sha kano kano ka kharkhana thymmai.

U CEM ula ong ruh ba ba ki don hynniew phra tylli ki kharkhana thymmai kiba wan pan NOC na ka JHADC, hynrei namar ka jingpyrshah uba bun balang ka konsil kala pynsangeh shuwa ban ai NOC.

U CEM ula ong ia kane ha ki nongialam ka MPUF, u president Michal Chyrmang bad ki nongialam ka Mukhaialong San Shnong Circle kiba la leit ban ai dorkhat ha u CEM mynta ka sngi ba Ar ban dawa weng iaki NOC jong ki lai tylli ki kharkhana sain rnga dewiong (Coke) naka JHADC kaba kynthup ha Elaka Rymbai bad ar tylli kiba hap hapoh Ka Elaka Sutnga East Jaintia Hills.

Ha kaba ia dei bad ka jingdawa pyndam NOC, u CEM ula ong iaki nongialam ka MPUF ba kalong kaba eh ban pynduh NOC ia kano kano Ka kharkhana, lada kata ka kharkhana ba pan NOC kala biang lypa baroh ki NOC na kiwei ki tnad Sorkar lane ki NOC na ki Dorbar shnong.

“Ka nongrim baka MPUF ka pyrshah ia ki kharkhana sain rnga dewiong ka dei namar ba ka pynjaboh iaka haw haw bad ka ktah ruh iaka khoit ka khiah u briew. Ka jingwan jong kine ki kharkhana kam ai jingmyntoi iaka konsil bad wat iaki trai shnong, hynrei kine ki kharkhana ki shu pynjaboh iaka marriang,” ong ka MPUF.

‘Ka single window jong ka Sorkar Jylla ruh kam dei ban ai NOC klumar bad dei ban iasyllok bad ka JHADC bad ban khot iaka jingpynsngew paidbah shuwa ban ai NOC sha ki kharkhana,” ong ki nongialam ka MPUF bad kala rai ban ai da ka jingthoh sha ka Meghalaya State Pollution Control Board (MSPCB) bad sha ka Sorkar Jylla.