Ka jingai jamin ia ki nongtuh umphniang petrol ka shong ha ka iingbishar: CM

Syllad | The Rising MeghalayaDecember 14, 2023

U Myntri Rangbah ka jylla u Conrad K Sangma haka 13 atrik Nohprah, u la ong ba ka jingai jamin ia ki dkhot jong ka Seng North East Petroleum Mazdoor Union (NEPMU) kiba shah kem halor ka jingkynnoh donkti ha ki kam tuh umphniang petrol ka shong ha ka iingbishar ym ha ka sorkar.

U CM u la ong ruh ba ka jylla Meghalaya ia mynta hi kam pat iakynduh jingeh ha kaba iadei bad ka jingdonkam ia ka umphniang petrol bad diesel bad ba ki briew kim dei ban klumar jingmut.

Ia kane u Conrad u la pynpaw halor ka jingdawa jong kane ka seng NEPMU ban pyllait noh ia ki dkhot jong ka kiba shah set along, kata ha ryngkat ka jingbyrthen ban pynsangeh ia ka jingpynpoi ia kino kino ki mar umphniang sha Meghalaya kaba la sdang naduh ka sngi ba Ar lada ym lah ban pyllait ia ki.

Haba kren sha ki lad pathai khubor u Sangma u la ong; “Ngi la dep ban iamir jingmut lang bad baroh bad kane ka kam ka la don hapoh ka iingbishar. Ki la kyrpad na ka bynta ban ai jamin, hynrei ia kane lah ban leh tang da ka iingbishar ym da ka sorkar, kumta kane ka kam ka dang iaid shakhmat.”             

Da kaba kyntu ia ki paidbah ba kim dei ban klumar jingmut, u CM u la ong; “Ia mynta hi Nga kyrpad ia ki paidbah ba kim dei ban khuslai halor kine kiei kiei baroh, bad na ka liang ka sorkar jylla kan sa pyntip ia ka jinglong jingman halor ka jinglong jingman bad ruh ban ym pynsngap ia ki khubor hamsaia kiba lah ban pynsngewthuh bakla ia mynta hi.” 

“Ka long ka jingshisha ba ka don ka jingeh, kata halor ka nongrim ba ka jingiakren ka dang iaid shakhmat bad ngi la pyrshang ban weng ia kine ki jingeh baroh.Watla katta  ia mynta hi kam pat don kano kano ka jingeh ha kaba iadei bad ka petrol bad diesel hapoh ka jylla.”