Ka jingbym ioh scholarship ka dei ka jingkyntait ia ka hok ki samla pule trai muluk: Bernard

Syllad | The Rising MeghalayaFebruary 24, 2025

U MDC ka BJP na Tura u Bernard N Marak haka 23 tarik Rymphang u la ong ba ka jingbym ioh scholarship jong ki samla pule ka Jylla ka dei ka jingkyntait bad shukor ia samla pule trai muluk halor ka hok ka jong ki kaba ki dei ban ioh.

Lyngba u kyrwoh u Bernard u la ong, “Nga la tohkit na ka Tribal Ministry halor ka jingpynslem ban ai ia ka scholarship sha ki samla pule ha kaba la pyntip ha nga ba ia ka list ba la phah da ka Jylla la dep pyllait da kaba buh ruh kum ka kam kaba hakhmat eh. Hynrei, 90% kaba ka Sorkar Pdeng ka siew ym lah ban phah sha ki account jong ki samla pule tad haduh ban da phah ia ka bhah kaba 10% jong ka jingsiew da ka sorkar Jylla.”

“Ka jingpynslem ka sorkar Jylla ban pyllait ia ka list jong ki samla pule bad ka jingphah ia ka bhah kaba 10% ka jingsiew ka la wanrah ia ka jingeh bad ka jingpynslem ban pyllait ia ka scholarship bad kaba la pynduh noh ia ka hok jong kiba bun bah ki samla pule,” ong u MDC ka BJP.

U la ong ruh, “Ka sorkar jylla ka la ot 4% ka khajna Cess na ki mobile recharge jong ki samla pule man u bnai kaba la kot da ki klur tyngka namar uwei u samla pule trai muluk u recharge T.300 shi bnai bad siew T.12 kum ka khajna cess sha ka Sorkar.”

Haba pynpaw kumno ka sorkar kam lah ban pynkhuid ia ka 10% ka jingsiew ha ka por kaba biang ka buh ia u dak jingkylli uba heh,  u Marak u la ong, “La kyrpad ia u Myntri Rangbah ka Jylla bad u Myntri ka Tnad pule puthi ba ki dei ban weng ia kane ka jingeh kaba ki samla pule trai muluk ki iakynduh namar kiba bun na kine ki samla pule ki dei kiba wan na ki longiing kiba duna ha ka liang ka ioh ka kot. Lada ka pule puthi ka dei ka thong kaba hakhmat eh kumba la kular ha ka por elekshon, kumta ruh ban shimkhia na ka bynta ka jingbit jingbiang jong ki samla pule.”