Ka jingbyrngem pyniap ka HNLC ka dei tang ka kam iasylla sain hima bym don nongrim, ong u MLA ka Sohra

Syllad | The Rising MeghalayaJanuary 2, 2024

U nongmihkhmat ka NPP na Sohra u Bah Gavin Miguel Mylliem haka sngi ba Ar u la jubab halor ka jingbyrthen pyniap ba dang shen jong ka Seng Hynniewtrep National Liberation Council (HNLC) pyrshah ia u halor ka jingthmu jong ka sorkar ban khangdam noh ia ka karkhana Mawmluh Cherra Cements Limited (MCCL) da kaba ong kane ka dei tang ka kam biej bad ka kam iasylla sain hima ka bym don nongrim.

“Halor kitei ki jingshisha, Nga sngewkyndit shibun halor ka jingbyrthen jong ka seng HNLC ia nga shimet. Ka long kaba sngewkyndit namar katkum ka jingtip ka jong nga, kane ka dei ka sien kaba nyngkong ba ka HNLC kan pynmih ia ka jingbyrthen pyniap pyrshah ia u sitting MLA bad kaba pynpaw ba kane ka seng ka don bynta ha kam sain hima sima ha ka jylla,” ong u MLA ka Sohra.lynti

U la ong ruh ba kum kine ki jingbyrthen pyrshah ia u MLA uba don ia ka bynta kaba khraw na ka bynta ka bha ka miat jong ki paidbah nongshong shnong kan nangpynsah dak sniew ia kane ka seng, bad shim ruh ia kane ka jingdawa ba ialam bakla jong kane ka seng kum ka jingdang duna ha ki lad jingtip ia ki jingshisha halor kane ka bynta bad u kyrmen ruh ba ka HNLC ka dei ban kiar na kiba kum kine ki jingpynpaw ki bym don nongrim.

U Bah Gavin u la ong ruh ba katei ka jingbyrthen jong ka HNLC da kaba tei pop ia u halor ka jingkhyllem noh jong katei ka karkhana pynmih dewbilat (MCCL) namar ka jingthmu khangdam jong ka sorkar bad ban pyntreikam da ka VRS ia baroh ki nongtrei kiba dang don ka dei ka bym don nongrim namar baroh ki tip ba ia kino kino ki rai ba la shim da ka sorkar kam dei kaba rai shimet kumba u la shah tei pop.

Halor ka jingdawa iehnoh kam jong ka HNLC, u MLA u la ong, “Nga dei uba la shah jied ha ki paidbah ka 28-Sohra Constituency naduh u snem 2018 ter ter bad un iai bteng ban shakri ia ki paidbah ka constituency kat kum ka lynti jong ka ain. U la ong ba ki paidbah ka constituency jong u ki tip bha ba um ju kynran dien haba pyrshang ban shakri ia ki briew jong nga da ka jinglehhok bad jingaiti, kaba la paw na ki kam pynroi kiba la mih hapoh ka constituency.

Da kaba pynpaw ba kane ka karkhana MCCL bad ki jaka treikam ba kongsan jong ka ki hap hapoh Shella Constituency bad ym hapoh Sohra kumba la pynpaw da kiba bun, u Bah Mylliem u la ong kane hi ka dei ka daw kaba biang eh ia u MLA ka Sohra ba un ym sngewkhia palat ia ki kam jong ka MCCL bad ban ieh beit ia kiei kiei baroh ha u MLA ka Shella. Watla katta u la ong ba kum u nongmihkhmat u la pynpaw ba u la  pynsngew bunsien ia ka jingsngewkhia halor ka kam MCCL hapoh ka Iingdorbar Thaw Ain ka Jylla namar ka don jingktah ruh ia kiba bun ki briew la ka dei n aka constituency jong u lane kim dei ruh.

“Ha nga hi shimet ka nga ba ka MCCL ka la poi sha une u pud kumba ka long mynta namar kiba bun ki daw, bad ka jingtei pop ia u MLA ba mynta halor kane ka jinglong jingman ka long ka bym don nongrim namar lada dei ban kylli jingkylli bad lada dei ban tynrong ia ka jingkitkhlieh, ki dei ban kdew ia ki kti sha ki briew kiba la treikam ha ki kyrdan bapher bapher naduh u snem 2007 ter ter ha ka por ba ka jingtreikam jong ka karkhana kala sdang ban troin.