Ka jingbyrthen ka seng niam Hindu ka dei kaba sngew bynniaw shibun; ong u Myntri ka Jylla

Syllad | The Rising MeghalayaDecember 17, 2024

U Myntri ka Tnad pule puthi u Rakkam A Sangma ha ka 14 tarik Nohprah u la ong ba ka jingbyrthen ba dang shen jong ka seng niam Hindu ban khang ia ki surok ba kongsan ka Meghalaya ka long kaba sngew bynniaw shibun.

“Nga ju ong barabor ba ki seng niam kim ju pynmih ia ki jingbyrthen bad kim dei ruh ki kynhun kiba dei ban pynmih ia kum kine ki jingbyrthen, kane ka long kaba sngew bynniaw shibun. Ka niam ka dei na ka bynta ka jingsuk. Ngi duwai ia U Blei na ka bynta ka suk ka sain jong ki briew shimet, na ka bynta ki longiing longsem bad ki nongshong shnong,” ong u Myntri haba kren sha ki lad pathai khubor.

Kane ka seng niam Hindu ka Kutumba Surakshya Parishad (KSP) ka la ai por 10 sngi ia ka sorkar Meghalaya ba ka dei ban plie ia ka krem Mawjymbuin na ka bynta ka jingleh niam jong ki riewngeit HIndu. Kane ka kynhun ka la maham ruh ban khang ia ki surok ba kongsan ka Meghalaya, kaba kynthup ia ka surok ha Jorabat hajan Guwahati lada kane ka jingdawa ka jong ki kam urlong shwa ka jingrakhe Khristmas.

Haba jubab ia kane ka jingbyrngem jong kane ka seng niam Hindu, u Myntri  ula kyntu ba ka dei ban sngewthuh bad ban burom lem ia ka jingsngew jong ki trai shnong. U la ong ba kiba kum kine ki jingbyrthen na ki seng niam kim long satia kiba sngewtynnad bad kim ai ruh ia ka khubor ba bha kum ka kynhun niam.

Nalor kata u la ong ruh ba ka jingleh niam kam mut ba tang ha Mawsynram kin ioh ia ka jingkyrkhu.

“Haba ngi kwah ban mane Blei mane ha la ki jong ki iing ki sem, ha ki jaka ba marjan jong phi, phi don ia ki jaka mane (Mandir) kiba heh ha Assam.

“Ka jingmane Blei ha Mawsynram kam pyniapher ia phi bad ia u, U Blei u don ha ki jaka baroh, kata ka mut ba lada phi kwah shisha ban mane Blei, mane ha la ki jong ki iing ki sem, phi don ia ki temple, shna la ka jong ka temple ha la iing,” u la bynrap.

Lah ban kdew ba kane ka kynhum kynram ha kaba iadei bad ka krem Mawjymbuin kaba don ha Mawsynram ka la iaid mynta lah katto katne bnai hadien ka jingthmu wan leh niam jong ki riewngeit Hindu hapoh kane ka krem kaba don ia u maw uba ki ngeit u dei u Blei Shiva, hynrei ia kaba ka Dorbar Shnong Mawsynram ka la khang pyrshah.