Ka jinghikai kumno ban pynwandur bad pynitynnad iaki jingbam tynrai ha War Jaintia

Syllad | The Rising MeghalayaSeptember 8, 2023

Kum shibynta jong ka training ia ki samla ka thain Satpator ha ka kam shet jingshet, ka SURE ka shim khia ruh ha kaba kumno ban nang pynbha ia ka jingbam tynrai. Kane ka training kan long na ka bynta 17 sngi bad ki jait jinghikai kiba yn sa ai ha kane ka training ki dei, ka rukom shet ia ki jingbam Indian, ki jingbam Chinese bad ki jingbam tynrai.

Haka 6 tarik u Nailur la pynlong ia ka jinghikai kaba kyrpang tang ha kaba kumno ban pynitynnad (glamorization) ia ka jingbam tynrai. Ki nongwanshah training kiba wan na ki shnong bapher bapher jong kane thain Satpator kila wan rah ia ki jinbam tynrai ba ki pynkhreh bad la iarap pynitynnad ia kine ki jingbam kiba kila shet da u Chef Lambhah Kma. Ia kane ka jingshet bad jingpynitynnad ia ki jingbam tynrai la pyndep da nongwan shim training kiba la bynta ha ki group kiba pher bap her. 

U Chef Lambhah Kma u ong ba ka jingbam tynrai ki jong ngi kila long lypa kiba don pura ia ki bynta ba tei met, kaba sah ka long satang ban ngin pynitynnad ia kine ki jingbam. Ula ong ruh ba ka jaidbynriew jong ngi ka riewspah bha ha ki jingbam tynrai kiba bunsien ki dei kiba la shet da ki jhur ne ki soh kiba ioh na ki khlaw (wild edible). Ka jingkyrmen ka jong u ka long ba ki dukan die jadoh kin sdang ban shimkhia ha kaba kumno ba kin pynitynnad ne pynibang ia ki jingbam kiba ki die.

Ka Ilasiewdor Gashnga kaba long ka Program Coordinator Skill Training jong ka SURE ka ong ba wat la ialade ka dei ka War hynrei haba ka peit ia ki jingbam kiba ki nongwan shim training kila wan ban pyninam ha kane ka sngi, ki dang bun kiba ialade ruh im tip ne im ju iohi. Ki katto katne jait ki jingbam tynrai kiba la shet da ki nongwan shah training ki dei ka jyntah Sohslung, ka jyntah Tham, u Soh sten, Sohlkhein, u Pron, Jia jekeng, Jia herew, jia Sohlewi, Jia Lekedung, Jia Chan, jia sohlachit, Chiah koi, bad Sohrma. Ha kaba ia dei ba ki jait kpu pat kila wanrah da u twew puri bad u twew resai.

Ka kong Ilasiewdor ila ong ruh ba ka long kaba itynnad ban iohi ba ki samla ki sngewsarong ban pyninam iala ki jong ki jingbam tynrai.

Lah ban ong ba wat tang hapdeng ki shnong kiba don ha ka thain War Jaintia ruh, ka jingbam tynrai ki Nongtalang ka lah ban don ka jingiapher bad ka jong ki thain Padu, Satpator ne Amwi. Ka kong Ilasiew kala ong ba kane hi ka pyni shaphang ka jingriewspah ka bam tynrai jong kane ka thain.

Kham haswha ia kane la ioh ia ka jingai jinghikai shaphang ki jingbam bakongsan kiba tei met da ka kong Pasqualina Lamare kawei na ki staff jong ka SURE bad la ioh ruh ia ka jingkren na u ma Lambormi Suchen, Skill Development Officer West Jaintia Hills District. U ma Suchen ula iaroh ia ka SURE ba kala lah ban pyniaid ia kane ka training. U ma Suchen ula kyntu ruh ia ki samla ba kin pyndep ia ka training bad ban sdang leh eiei hala ki jong shnong ki jong ki.

Ki nongshim training kiba la wan iashim bynta ha kane ka training ki dei ki samla na ka shnong ba marjan kum  na Amlari, Jong u chen,  Amjalong, Nongtalang nalor ki shnong kiba hap hapoh ka Syndai kum ka Syndai kmai Shnong, Syndai Mission bad Syndai Lyngkot.