Ka jingiakajia halor ka krem Mawjymbuin kadei ka buit ka BJP-NPP ban pynphai khmat ia u paidbah

Syllad | The Rising MeghalayaDecember 20, 2024

U president ka Seng Congress uba dei ruh u MP barim ka Shillong, u Bah Vincent H Pala ha ka 19 tarik Nohprah u la kynnoh ba ki kynrum kynram bad ki jingiakajia halor ka krem Mawjymbuin ka dei tang ka buit shukor sain hima ba la iasylla hapdeng Bharatiya Janata Party (BJP) bad ka National People’s Party (NPP).

“Kine baroh ki dei tang ki buit shukor sain hima jong ka BJP-NPP ban pynphai ia ki jingmut jingpyrkhat jong ki paidbah,” ong u Bah Palat haba kren sha ki lad pathai khubor.

Ka seng niam Hindu ka Kutumba Surakshya Parishad (KSP) ka la ai por 10 sngi ia ka sorkar Meghalaya, da kaba dawa ban plie biang ia ka krem ​​Mawjymbuin na ka bynta ki jingleh niam jong ki riewngeit Hindu. Katei ka kynhun ka la maham ruh ban khang ia ki surok ba kongsan jong ka Jylla Meghalaya, kynthup ia ka Jorabat, kaba don hajan Guwahati, lada ym lah ban pynurlong ia ka jingdawa jong ki hashwa ka Khristmas.

“Ka BJP ka la pulom bad ka NPP ruh ka la pulom, u droks u la saphriang kylleng ki jaka. Ka ioh ka kot ka la hiar bha. Kumta kine ki dei ki jingiasylla lang jong ka BJP bad ka NPP ban pynphai ia ki jingmut jingpyrkhat jong ki paidbah. Kine baroh ki don hapoh ka jingsynshar jong ka BJP. Ki Sengbhalang la kumno kumno ha kiba bun rukom ki iadei tang bad ki”, u la ong.

“Namar ba ki paidbah ki la kynthoh ia ka sorkar, kumta ki wad ia ka lad ki lynti ban pynkylla ia ka jingmut jingpyrkhat jong ki paidbah lem kumta ym don ka niam kaba lah ban pynbor iano iano ruh. Ngi dei ki riewlum, ngi don la ka jong ka kolshor, ka rukom treikam bad ki jingleh jingkam bad ki shnong ki don la ki jong ki aiñ,” u la pynpaw.

Pynbna ka Congress iaki 26 ngut ki kyrtong sha ka elekshon MDC na KHADC bad JHADC