Ka jingiakhun kaba jwat ia ka NPP, vote ki nongkyrshan TMC ia ka Congress ha Garo Hills: Rakkam

Syllad | The Rising MeghalayaApril 24, 2024

U nongialam ka National People’s Party (NPP) uba dei ruh u Myntri ka Sorkar Jylla u  Rakkam A Sangma u la kubur ba kane ka  ilekshon Lok Sabha kaba dang shu dep ka dei kaba jwat bad mar iatan, hynrei u la pynpaw ia ka jingkyrmen ba ka NPP kan ioh ia ka jingjop napoh Shillong bad Tura parliamentary seat.

Haba kren sha ki lad pathai khubor haka 23 tarik Iaiong, u Rakkam u la ong, “Ngi la hap ban iakhun ia ka ilekshon kaba jwat bad ka bym shym la poi pyrkhat hapoh Garo Hills bad kumjuh na Shillong parliamentary constituency.”

“Watla katta da ka jingkyrkhu jong U Blei, ngi kyrmen ban ym jop bun bad ka NPP kan lah ban phah biang ia ka Agatha K Sangma shapoh Delhi hadien ka ilekshon,” u la ong.

Haba kylli ia ka daw ha lyndet kane ka jingbatai lypa ka jong u, u Rakkam u la ong, “Kane ka long namar baroh ki nongkyrshan jong ka Trinamool Congress (TMC) ki la ai ka jingkyrshan ia u kyrtong ka seng Congress u Saleng A Sangma uba dei ruh u MLA ka Gambegre ha kaba ia ka daw halor kane ki kham tip bha ma ki.”

La ka BJP ka lah ban long pynban kum ka nongpynjot da kaba aijingkyrshan ia ka NPP, une u Myntri u la ong, “Ngam tip haduh katno kan long kaba shisha. Nuksa, Ngam tip ka BJP kam shym la pynieng kyrtong na Shillong bad Tura. Ha ka ilekshon MLA kaba la dep, ka BJP ka la ioh 90,000 vote na Tura. Lada ka ai shisha ka jingkyrshan ia ngi, kane ka 90,000 vote ka dei ban leit sha ka NPP bad kan jin da la long ka jingkyrkhu, hynrei Ngam tip la kane kan jia ne em.”

U pynkynmaw ruh ba ha ka ilekshon MLA 2023 ka jingwan ialap ilekshon jong u Myntri Rangbahduh Narendra Modi bad u Myntri kam pohiing u Amit Shah ha Tura kam shym la don jingktah khyndiat ruh ha Meghalaya.

Haba phai sha ka Shillong parliamentary constituency, na ka liang u Rakkam u la ong, “Kat kiba jop kum ki MP Nga ai ka jingkhublei na ka bynta jong ki. Hynrei, u pynpaw ia ka jingkyrmen ba ka kyrtong jong ka NPP kan ioh ia ka jingjop.

Da kaba pynpaw ia ka Shillong seat kum kaba kongsan bad kaba don burom, u Rakkam u la ong  ba ki paidbah nongthep vote ki tip bha iano kin jied namar ka Meghalaya ka dei ka bym don ei ei ruh na lade. Kino kino ki ban wan ha ka bor kum ki MP, kata la ka long na kino kino ki party ka Meghalaya kan lah ban pyniaid ia ka sorkar tang lyngba ka jingleh isynei jong ka sorkar pdeng.