Ka jingialang paidbah ka Synjuk Waheh Shnong Ri Jaintia haka 8 tarik Jylliew, yn pynskhem iaki nongkitkam

Syllad | The Rising MeghalayaJune 2, 2024

Ka Synjuk Waheh Chnong Ri Jaintia kala pyntip ba kan pynlong iaka jingialang paidbah (General Meeting) ha District Library Auditorium, Jowai haka 8 tarik Jylliew haka por 11.00 baje mynstep.

U President ka Synjuk Waheh Chnong Ri Jaintia, u Ma A. Lypon ula pyntip ba kane ka jingialang kan long kaba kyrpang naba yn pyntian smai iaki nongkitkam bathymmai jong ka Synjuk, kata naduh ki Office bearers bad ki dkhot jong ka EC baroh.

Nalorkata ula pyntip ba ha kane ka jingialang yn iakren ruh halor ki mat ki jura hapoh ka imlang sahlang nalor kiwei kiwei jingdonkam jong ka synjuk bad kumjuh jong ki shnong ki thaw ha baroh Ar tylli ki District.

Ula pyntip ba nalor ki waheh shnong yn donlang ruh u u Myntri ka sorkar Jylla bad MLA ka Khliehriat Ma Kyrmen Shylla kum u kongsan bad u MDC JHADC Ma Finelyness Bareh un long kum u symbud kongsan.

Kumta ka synjuk ka kyntu bad khot wer ia baroh ki Waheh shnong ka Rilum Jaintia kynthup na East bad West Jaintia kumjuh ki Life Members ban pyllait iaka por ban wan sha ka jingialang khnang ba ka jingthmu jong ka synjuk kan long kaba iaid beit iaid ryntih.