Ka jingiasyllok kadei kawei na ki lad ban tei iaka long briew bad ka imlang ka sahlang: Edystone Shylla

Syllad | The Rising MeghalayaJanuary 11, 2022

U waheh shnong jong ka Dorbar Shnong Tympang Iawmusiang ula ong ba ka jingiakynduh lang ki samla kalong kaba kongsan bha ha kine ki sngi kiba mynta khnang ba kin ioh ka lad ban iathir jingmut bad ban iakren na ka bynta ban iatei iaka imlang ka sahlang bad ialade shimet haka longbriew man briew.

U Ma Edystone ula ong ia kane haba kren u kongsan haka prokram National Youth Convention, ula ong kum kane ka prokram ka ai jingmyntoi iaki samla samhoi khnang ba kin ioh ka lad ban iasyllok la ha sor ne nongkyndong bad ban trei kino kino ki kam ban myntoi ialade bad iaka imlang ka sahlang.

Ia kane ka prokram la pynlong da ka Society for Urban & Rural Empowerment (SURE), Jowai ryngkat ka jingiatreilang bad ka Nehru Yuva Kendra Sangathan Jowai ha ka 10 tarik u kyllalyngkot ha HK Singh Memorial Secondary School Jowai.

U Ma Edystone ula iaroh iaka SURE kaba pynlong ia kane ka prokram bad kyntu iaki samla ban long kita ki briew kiba don jingkitkhlieh na ka bynta ka shnong ka thaw bad ri baroh kawei.

Hakane ka sngi la ioh ia ki jingbatai halor saw tylli ki mat kaba nyngkong ka dei shaphang ka soft skill kaba la ai da u Rev.Dr. H.H Mohrmen. Ha kane ka jingkren la kynthup ia ki phang kum ka Effective Communication, Empathy, Critical Thinking kaba don ka jingiadei bad ka Decision making bad ki Leadership style kiba bun.

Kaba ar ka dei shaphang jingiohlok dang khynnah ba la ai da ka Niwankan Shylla, kaba lai shaphang u drugs bad ki jingdih ba bunjait la ai da I Dakapaia Bareh bad ka ba saw ka dei shaphang ka AIDS ba la ai da I Coriniki Slong kiba long ki staff jong ka SURE.

Palat 50 ngut ki khynnah samla shynrang bad khynthei jong ki shnong bapher bapher na ka west jaintia ki la wan ban iashim bynta ha kane ka program bad ki la pynpaw ba ki la ioh jingmyntoi shikhatdei eh na kane ka prokram.

Ka Felicia Liam na ka shnong Demthring, West Jañtia ka la ong ba “ka jingshong kha khynnah ne ka jingshong kha khlem pat dei por kala kynrei bha sha nongkyndong kumjuh ruh ka jingdih buaid kumta kane ka prokam kala ai jingmut shikatdei eh ia nga.”

Wikidaroilangki Lamare ba na Mynthong, Jowai ula ba “ki mat iakren mynta ka sngi ki dei kiba donkam, hynrei ka jingkren halor ka communication skill ka long ka ba donkam bha bad kaba ai jingmut ia ki samla ha ka jingim ba man la ka sngi.”

Ka Delphi Mystica Bareh ka samla na Nongtalang kala ong ba ka la ioh jingmyntoi shi katdei eh na kane ka program bad kaba kham kongsan ka dei ka jingshaniah ha ka jinglah lajong bad  ba kiei kiei baroh ki dei ban sdang na iing. Ia kane ka prokram la pyndep da kaba bud ryntih ia ki kyndon pyrkhing ka sorkar kiba iadei bad ka khlam kobid.

Ia ka jingialang la pyniaid da i kong Ailut Kyndait, ka jingkren pdiang sngewbha la ai da ka kong Pasqualina Lamare bad ka jingkren ai khublei la ai da ka kong Darimika Lywait na ka SURE.