Ka jingiateh kular ka NPP bad ka Sorkar NDA ka long tang na ka bynta ki kam pynroi ha ka Jylla: Prestone

Syllad | The Rising MeghalayaFebruary 12, 2025

U President ka National People’s Party (NPP) Meghalaya bad Symbud Myntri Rangbah ka Jylla, u Bah Prestone Tynsong ha ka 11 tarik Rymphang u la ong ba ka jingiateh kular hapdeng ka NPP bad ka sorkar NDA ba ialam da ka BJP ha Delhi ka long beit tang na ka bynta ki kam pynroi ia ka Jylla.

Haba kren ha ka jingialang ialap elekshon ban pan jingkyrshan ia ka kyrtong ka party kaba dei ka MDC ba mynta ka Kong Macdalyne S Mawlong ha Umsning, Ri Bhoi District, u Bah Tynsong u la ong, “Ki kam pynroi na ka bynta ka Jylla ka dei ka daw jong ka jingiateh kular hapdeng ka NPP bad ka Sorkar NDA.”

Haba kyntu ia ki paidbah ba kim dei ban shah ialam bakla ba ka NPP ka dei ka BJP, u la ong ba hadien ba la shimti ia ka sorkar Jylla ha u snem 2018, ka NPP ka don tang kawei ka mat treikam, bad kata ka long ban shakri ia ki paidbah ka Jylla.

“Hadien ba ka sorkar NDA ka la pynkhyllem noh ia ka Congress ha Delhi, ka NPP hapoh ka jingialang u National President u Conrad K Sangma ka la shim ia ka rai ban ia long paralok bad ka NDA bad ym Bhai-Bhai kumba la kynnoh. Ngi la buh ia ka mat jong ki kam pynroi hakhmat ka NDA, bad namar kane, ka Jylla ka la sakhi ia ka jingwan jong ki project bapher bapher ba la dei da ka sorkar Pdeng. Ka dei tang kane ka jingiateh kular ba ngi don bad ym palat ia kata,” pynshai u Bah Prestone.

Katkum ka jingpynpaw ka jong u, kine ki project ki long kiba kongsan na ka bynta ka roi ka par ha baroh ki liang jong ka jylla bad ki nongshong shnong jong ka.

“Hato phi lah ban mutdur ba dang shen ngi la buh mawnongrim na ka bynta ban tei ia ka Secretariat kaba thymmai ha New Shillong township khnang ban pynkylluid ia ka Shillong. Ka jingpyntrei na ka bynta kane ka project ka long haduh palat T.1200 klur ia kaba yn sdang noh shen,” ong u Bah Prestone haba kynthoh ia ki liang pyrshah da kaba ong, “Ngam tharai ba kin ia phohsniew ban pynkynriah ia ka Secretariat na sor Shillong watla ki la don la palat 40-50 snem.

U Symbud Myntri Rangbah u la kular ruh ba kane ka Secretariat bathymmai kan dei ka jingjop kaba khraw tam ia ka Jylla bad ki paidbah da kaba ong, “Nga kyntu ia ki paidbah ka Jylla khamtam ia ki samla ba kim dei ban shah pynsngewthuh bakla hynrei ban bishar ia ki kam babha jong ka NPP. Dei ha kane ka por ka jong ngi ba ki project ba la sahteng kum ka Crowborough mynta ka Vivanta Taj bad Five-Star hotel –ka Marriot la lah ban pyndep. Ngi la thaw ia ka IT Centre ha Mawdiangdiang abd ka Lariti Centre ka dei kawei na kiba heh duh hapoh ka thain Shatei Lammihngi bad kine baroh ki dei na ka bynta ka jingmyntoi jong u paidbah.”

“Kumta ngi donkam ban iatreilang bad ki briew kiba na shabar ka Jylla khamtam mynta ba kin dang wan shuh shuh ki Five Stat Hotel bad kawei na ki kan don ha Ri Bhoi District khnang ba ki samla na ka District kiba la pyndep ia ki jingpule Hotel Management kin ioh kam ioh jam,” u la ong.

Nalor kata u Bah Prestone u la kam ruh ba kane ka sorkar ba mynta ka la lah ruh ban ai shibun ki kam ki jam sha ki briew bad ong, “Kane ka la wan long wat hadpeng ka jingshah kynthoh ka jong ngi, hynrei nga ong haphi sngewbha bteng ban leh ia kata namar kat kaba phi dang leh, ka jingkyrkhu ruh ka nang wan sha ki paidbah ka Jylla. Nga kyntu ia ki paidbah ka jylla ba kin bteng ban duwai na ka bynta ka party khnang ba ngin lah ban wanrah ia ki jingkylla kiba donkam na ka bynta ka jingmyntoi bad ka bha ka miaat jong ki paidbah nongshong shnong ka Jylla.”

Haba kyntu ia ki paidbah ka Umsning ba kin ai ka jingkyrshan ba pura ia ka Kong Macdalyne, une u heh ka NPP u la ong, “Phi long kiba donbok namar ka Ri Bhoi kadei ka District kaba dang kiew shaphrang bad bun ki project kin sa wan hynrei ngan ym iathuh ia phi hangne namar lada nga iathuh phin sa ong ba nga wan hangne ban pynbiej ia u paidbah. Hynrei, nga kyrpad ia phi ki samla jong ka District ban trei shitom ha ki jingpule ki jong phi namar ki kam ki jam ki la ap lypa na ka bynta jong phi.”

U Bah Prestone u la pynpaw ruh halor ki jingmyntoi kiba ki paidbah kin ioh lyngba ka Western Bypass da kaba ong, “Tang na ka jingsiew bai jaka haduh palat T.620 klur la siew sha ki trai jaka na ka bynta kane ka project.”

“Kumjuh ruh haduh palat T.5000 klur yn siew ia ka bai jaka na ka bynta ka Express Road Project na Umiam sha Malidor sha Silchar. Ka dei ka project kaba T.25000 klur ha kaba T.18000 klur ka dei kaba la mang tang hangne ha Meghalaya. Ka jingleh ia ka sorbe ka la iaid shakhmat mynta katba ngi dang iakren bad ngi pan ia ka jingiatreilang jong ki Khlieh Nongsynshar lem bad kiwei pat ki kynhun kiba don bynta,” u la bynrap.