Ka jingïatreilang ka rukom sumar Ayurveda & Khasi kan wanrah jingmyntoi ïa ka jylla: Hek

Syllad | The Rising MeghalayaMay 2, 2019

SHILLONG: Kum shi bynta ban kyntiew ia ka rukom sumar Khasi ha ka jylla la plie paidbah ia kawei ka jaka ai jingsumar ba la tip kyrteng kum ka Mebaai Tribal Health and Wellness Centre ha Golflink Shillong bad la plie paidbah ia kane ka jaka sumar da i Kong Serina Wahlang, iba long i Kongsan haka sngi Palei.

U Myntri ka tnad ka koit ka khiah u Bah AL Hek ba dei ruh u MLA ka Pynthorumkhrah constituency ula shimkhia bha ban pynioh ia kane ka jaka ai jinsumar Khasi bad Ayurveda.

Kane ka jaka ai jingsumar la seng ruh ha ka jingiatreilang bad ka Vasudeva Vilasam na Kerala ban ai jingsumar ia ki paidbah lyngba ka Ayurveda bad kumjuh ba ki paidbah kin ioh ia ka jingsumar Khasi (Traditional Khasi Massage).

Haba ai jingkren ha katei ka sngi la ka liang u Bah Hek u la ong ba kane kan wanrah ia ka jingai jingsumar kaba kham pher sha ki paidbah ha kaba ka rukom sumar Ayurveda kan iaid lang bad ka rukom jingai sumar Khasi.

U la ong ruh ba ki nongshong shnong ka Golflink ki ba kot ia ka 70 snem ka rta lane ki ba la palat ia kane ka snem kin hap ban siew tang ia ka bai pynrung kyrteng kaba dei 10 tyngka hynrei baroh ka jingai jingsumar kan long kaba um donkam ban siew pisa shuh.

La ong ruh ba kane ka jingiatreilang kine ki ar tylli ki rukom sumar kan wanrah ia ka jingmyntoi ia ka jylla Meghalaya kaba don ia kumba palat 3000 tylli ki kynbat (medicinal herbs and plants) bad kumjuh ka jingdon bun ngut ki nong sumar Khasi.

U la ong ruh ba kane ka jingiatreilang da kaba ai jingsumar Ayurveda bad jingsumar Khasi kan khring ruh ia ka jing jngohkai pyrthei lyngba ka koit ka khiah (health tourism) bad kumjuh yn lah ruh ban kyntiew ia ka rukom sumar Khasi.

Na ka liang u Dr. Pradeep Jyoti na Kerala u la pynpaw ba ia kane ka rukom ai jingsumar Ayurveda la sdang ha bun tylli ki jaka hikai naduh u snem 1884.

U la ong ruh ba ka don ka jingthmu ban kam pynbha shuh shuh ia ki rukom shna dawai kynbat na ka bynta ki jingpang ba ha rukom bad kumjuh ruh ban kyntiew ia ka jingsumar Khasi kham shajrong.