Ka jingioh ia ka jaka shipai kaba biang tam ban pynkynriah iaki Harijan na Them Metor: Prestone

Syllad | The Rising MeghalayaJanuary 18, 2025

U Symbud Myntri Rangbah uba khmih ia ka Tnad kam Pohiing u Bah Prestone Tynsong u la ong ba ka jingioh ia ka jaka shipai lah ban shim ba ka dei ka sienjam kaba biang tam na ka bynta ban pynbeit ia ki jingeh kaba la sahteng la slem ban pynkynriah ia ki 342 tylli ki longiing Harijan na Them Iew Mawlong.

Haba kren sha ki lad pathai khubor ha ka 17 tarik Kyllalyngkot, u Bah Tynsong u la ong ba ka sorkar ka la kyrpad ia ka sorkar India ba kan mynjur ban ai tang kumba 2.5 lane 3 akar na ka jaka shipai bym shym la pyndonkam kaba don marpyrshah ka petrol pump ha Iew Mawlong.

“Lada ka Sorkar India ka lah ban leh ia kata, nga thikna ba tang hadien khyndiat por ngin sa lah ban pynbeit noh ia kane ka kam,” u la ong

Katba halor ka mat kaba iadei bad ka Gurudwara, u Bah Prestone u la ong, “Ngin dang poi sha kane ka bynta jong ka jingiakren (ban pynpra ia kane ka jaka mane) namar kat kaba ka Harijan Panchayat Committee (HPC) ka ong ngi kwah ban ioh ia ka jaka hajan ka jaka shong barim bad kane ka dei kaba ngi la pyrshang da kaba bteng ban kyrpad ban pynioh ia katei ka jaka shipai kaba don marjan.”

Ha kawei pat ka bynta, u Symbud Myntri Rangbah u la ong ba ka sorkar jylla ka la dep ban pynkhreh ia ka blueprint ne ka plan lada jia ba kam ioh satia ia ka jaka shipai.

“Hynrei, lada ngim ioh, ngi la dep ban pynkhreh ia ka blueprint ne ka plan. Ka sorkar ka la dep ban pynkhreh nadong shadong bad ka la don ha ki kti jong ngi,” u la bynrap.

Da kaba pynpaw ba ka sorkar ka dang ap ia ka rai jong ka sorkar Pdeng halor kane ka kam, u Bah Prestone u la ong, “Mynta ngi hap ban shu ap bad lehse ngin ioh ia ka jingkyrkhu na ka sorkar India na ka bynta katei ka jaka ia kaba ngi la dep ban tyrwa bad ia kaba wat ka HPC ruh ka la tyrwa.”