Ka jingjop ka VPP kam don jingiadei bad ka ilekshon 2028: Sniawbhalang Dhar

Syllad | The Rising MeghalayaJune 13, 2024

U National General Secretary ka Seng NPP uba dei ruh u  Symbud Myntri Rangbah ka Jylla u  Bah Sniawbhalang Dhar ha ka 12 tarik Jylliew u la ong ba ka jingjop bun jong ka Seng Voice of the People Party (VPP) ha kane ka ilekshon Lok Sabha na Shillong Seat kam don jingiadei bad kan ym don jingktah ia ka ilekshon MLA 2028 ka ban wan.

Haba kren sha ki lad pathai khubor, u Bah Sniawbhalang u la ong, “Phim lah ban pyniasoh ia kane ka ilekshon Lok Sabha 2024 bad ka ilekshon MLA 2028. Kalong kaba shisha ba ka don ka jingkyrmen ia ka VPP ba kan kiew ha ka jingioh seat, hynrei phim lah ban khein troin halor ki jingshisha ba ka NPP, UDP bad kiwei pat ki party ruh kin trei shitom namar ba ngi dang don por sa 3-4 snem.”

U Dhar u la ong ruh ba kane ka jingjop kam dei shuh kaba dang thymmai ha Meghalaya. “Haba peit ia ka histori, ha u snem 2019, u kyrtong ka Meghalaya Democratic Alliance u Bah Jemino Mawthoh u la iakhun pyrshah ia u Bah Vincent H Pala, hynrei u Bah Pala u la ioh haduh 4 lak vote bad ka dei ka jingjop kaba bun bha. Ngi la jop tang na Khliehriat constituency.”

“Kumta ruh ka ilekshon MLA, MDC bad MP ki iapher kawei na kawei pat. Kam mut ba ki (VPP) ki la jop ia ka ilekshon MP kin ioh kumjuh ka vote ha kiwei pat ki ilekshon, kam long satia kumta,” u la ong da kaba bynra ruh ba ,”U Bah Pala u la jop ha u 2019 da palat 2 lak vote hynrei ha u snem 2023 ka Congress ka la jop tang 4 seat na Rilum Khasi bad Jaintia. Kumta ruh ki paidbah ki la stad ban ia kaba phi pyrkhat. Kumta phim dei ban khein troin ia ki nongthep vote jong ngi.”

Nalor kata u la kubur ruh ba ki don ki nongkyrshan ka NPP napoh Nartiang constituency ka jong u ki bym shym la vote ia ka kyrtong jong ka Party. “Haba kylli, ki la pynpaw namar ba ym dei maphi uba ieng ialeh. Jin da phi iakhun ma phi ngin ym ieh satia,” ong u Dhar.

Haba ai khublei ia u Dr Ricky AJ Syngkon halor ka jingshah jied kum u MP bathymmai ka Shillong, u Dhar u la ong, “Shimet hi, nga burom ia ka rai jong u paidbah bad nga ai khublei ia u Dr Syngkon halor ka jingshah jied kum u MP bathymmai ka Shillong bad nga kyrmen ba un lah ban pynurlong ia baroh ki jingkular kaba ki la kular sha u paidbah ha ka por ilekshon.”

“Nga ai khublei ruh ia ki nongkyrshan ka NPP watla ngim shym la poi sha ka thong. Nga ai khublei ruh ia ki paidbah ka Narting constituency kiba la ai haduh 11000 vote ia ka kyrteng jong ngi,” u la ong. U Dhar u pynthikna ruh ba ka NPP kaba ialam ia ka sorkar MDA kan iai bteng ban shakri ia ki paidbah ka Jylla khlem kano kano ka jingpeit shiliang khmat.

Nalor kata haba pyntip ba kan sa don ka jingiamir bishar bniah halor ka jingbym lah jong ka party ban lehbha ha kane ka ilekshon kaba dang shu dep, une u nongialam ka NPP u la ong, “Ngin sa leh ia ka post mortem ban lap ia ki jingduna baroh. Lada phi jop ne rem, phi donkam ban leh post mortem. Namar ba ngi la shah rem shibun, kumta ruh ka jingleh ia ka post mortem kan iaid shakhmat bad ngin pyrshang ban pynbeit pat ia baroh ki jingduna kum ka party bad kum ka sorkar ha ka juh ka por.