Ka jingkhang shoh doh Masi kan ktah jur ia ki nong ot doh ka Jylla; ym dei ban ai jingbit: KJBWA

Syllad | The Rising MeghalayaSeptember 27, 2024

Ka Khasi Jaintia Butcher’s Welfare Association (KJBWA) bad ka Federation of Khasi Jaintia and Garo People (FKJGP) ha ka 27 tarik Nailur ki la pynpaw ka jingpyrshah kaba jur ha kaba iadei bad ka jingthmu pynlong ia ka rally Gau Dhwaj Sthapana Bharat Yatra ban ialap pyrshah bam doh masi ia kaba la pynbeit ban pynlong ha ka 2 tarik u Risaw 2024 da ka seng Hindu.

Ka KJBWA ha ka shithi sha ka Deputy Commissioner ka East Khasi Hills District ka la ong, “Kumta ngi kyrpad ia phi ba phin kyntait ban aijingbit ban pynlong ia kane ka rally khnang ban pynksan ia ki hok tynrai jong ngi, ban pynneh bad iada ia ka suk ka sain ka Jylla bad ban pynthikna halor ki ain ki ban iada ia ka jinglaitluid ka jong ngi.”

Ka la ong ruh, “Kum ki nongshoh doh, ngi ai ka jingshakri ia ka imlang ka sahlang, ngi burom ia ka hok ban jied halor ka bam bad ki jingleh jingkam tynrai jong ki nongshong shnong ka Meghalaya. Ka kam jong ngi ka dei kaba katkum ka ain bad ngi treikam hapoh ki kyndon jong ka Riti synshar khadar jong ka Ri.”

Shuh shuh ka KJBWA ka la ong ruh ba ka jingkhang shoh doh kan shu nang wanrah shuh shuh ka jingeh ha ka liang ka ioh kam ioh jam kaba la jynjar lypa bad ka ban nangktah jur ia ki longiing longsem bad ki nongshong shnong ki jong ngi.