Ka jingkhlad u Bah Frankie Pariat ka jingduh kaba khraw iaka ialehkai: Robinson P Ryntathiang

Syllad | The Rising MeghalayaJune 15, 2021

Ka jingkhlad kyndit jong i Bah Frankie Pariat ka laong kaba ym lah ban mut dur, bad kane ka jingleit noh ka jong i ka long ka jingduh kaba khraw la ha ka kliang ka sports bad ka office kaba i trei haduh ka sngi kaba khatduh, namar i long u briew uba kloi ban iarap lut ia baroh ha kino kino ki liang bad u bym ju dong ban ong em hynrei ban kloi ban kner ka kti kamon ka kti ka diang ha kiei kiei baroh, la ong u Bah Robinson. P. Ryntathiang.

U Bah Robinson ula ong “ka jingkhlad noh kaba kynsan ka jong i ha nga shimet ngam lah ban pdiang namar i lah iaieid thep mynsiem bha bad nga bad i naduh ba ngin dang pule ha skul, ha college bad haduh ba yn da khlad jyndet na kane ka pyrthei.”

U Bah Robinson ula ong shuh shuh ba I Bah Frankie Pariat i lah long uwei na ki nong ialehkai sports uba lah bna nam bha haka jylla ka jong ngi la ka long haka football ne ka athletics. Ha ka liang ka athletics katkum ka jingkynmaw ka jong nga naduh ki por ba ngi dang ia shong skul, college i lah long uwei na ki nongmareh uba tbit bha la ha ka 100 Mtr, 110 Mtr Hurdles, Triple Jump bad Long Jump.

I lah bat ruh ia ka record jong ka jylla ha ka Triple Jump bad Long Jump, i lah mihkhmat ruh ia ki ba bun ki club ha Inter Club Athletic meet ba la pyniaid da ka Shillong Sports Association bad ruh i lah mih khmat ia ka Shillong ha ka Inter District Athletic meet ha kaba bun ki snem.

“Nga kynmaw ba ha u snem 1987 I lah mih khmat ia ka NEHU haka inter University Athletic Meet ka ba long ha Patiala, Punjab, bad ha u snem 1991, I lah mihkhmat ia ka jylla Meghalaya ha ka Senior National Athletic Championship kaba lah long ha Gandhinagar, Gujarat ha kaba kane ka kynhun ki nongmihkhmat ki kynthup ia i Frankie Pariat, Robinson. P. Ryntathiang, Baiar. K. Thabah, Bhidayak Das bad Raju Thingbaijam,” la ong Bah Robinson.

“Kane ka long ka kynhun kaba nyngkong eh ban mihkhmat ia ka State ha ka Senior National Athletic Championship. Ia kane ka Team nga kynmaw ba lah sponsor da i Bah R. Rapsang kumba ngi ju ju khot ieid i Bah Deng.

To U Blei nongbuh nongthaw un ai ia i ka jingthiah thait kaba suk ha dwar jong u Blei, bad un ai ruh ka jingtngen ia i Kurim bad ki khun bad ia ka ing ka sem baroh. Thiah suk Frankie ha ki ksangti kiba im jong u Blei tad haduh ba ngin da iashem pat.” la pynkut u Bah Robinson.