Ka jingkhuid jingitynnad jong ka Wah Umkhen kan sa lip rong noh lada wanrah ia ka Marten ha Nonghali

Syllad | The Rising MeghalayaOctober 22, 2023

U Bah JJ Lyngkhoi uwei na ki riew rangbah jong ka shnong Mynriang, East Khasi Hills District ka shnong kaba don ha syndah jong ka Wah Umkhen u la ong ba ka jingthmu ka Sorkar lyngba ka tnad Urban Affairs (MUDA) ban wanrah ne pynlong jaka theh niut hapoh Nonghali ha u lum Sohlait ka jaka kaba don ha syndah ka Wah Umkhen tang kumba 100 meter ei ei ka jingjngai na ka jaka ba thmu ban pynlong jaka the niut kan ktah jur ia ki phew tylli ki shnong ba marjan kiba hap hapoh East Khasi Hills, Ri Bhoi bad Jaintia Hills District bad ka jingkhuid jingitynnad jong ka wah Umkhen ruh kan sa duh sa dam bad lip rong noh.

U la ong ruh ba lada ka long shisha kumba la sakhi lyngba ki lad pathai khubor ha kine ki khyndiat taiew ba la dep ha kaba na ka liang u Myntri ba khmih ia ka Tnat Urban affairs u Ma Sniawbhalang Dhar ula kren shai ba lada ym don ba pyrshah ia kane ka jingthmu jong ka Sorkar ban wanrah ia ka Marten hapoh Nonghali yn pyniaid beit shakhmat.

Nalor kata u la ong ba katkum ka jingtip ba ki la ioh kane la jaka theh niut kan long beit ka Land field (Kata ka mut shuh theh pyndap beit) Ym don hi re kino kino ki plan kum ba ka Sorkar ka ju kren ban yn pyntreikam noh da kata ka New Technology ne Scientific method hynrei ka dei beit ka land field.

Kumta kum u wei na ki nongshong shnong jong ka shnong kaba don ha syndah jong kane ka wah Umkhen u pynpaw ka  jingsngewdiaw bad sngewsih ban tip ia kane ka jingthmu ka Sorkar ban wanrah ia kane ka Marten hapoh Nonghali khamtam kane ka jaka ka dei kaba don ha Syndah ka wah Umkhen kaba kum ki nongshong shnong ki ju pyndonkam ha kaba iadei bad ka rep ka riang bad kiba bun kiwei pat ki jingmyntoi lyngba jong kane ka wah namar ym don shuh da kiwei pat ki wah lait tang kane ka wah Umkhen.

Nalor kata u la ong ruh ba lada ka Sorka kan wanrah shisha ia ka Marten ha kane ka jaka kam don kano kano ka jingartatien ba kane ka Wah Umkhen kan sa kylla rong bad duh noh ka jingkhuid bad jingitynnad jong ka. Kane kan pynjot ruh ia ki dohkha dohpnat kiba don hapoh kane ka wah bad ka lah ruh ban pynduh pyndam syndon ia kane ka wah.

Ha kajuh ka por u ai khublei ruh ia ka Synjuk ki nong Ki Nongsynshar Shnong Par Umkhen bad ia ka Seng ia ka HNYM Central Body kiba la shimkhia halor kane ka mat bad pynsngew sha ka Sorkar ba ka dei ban pynsangeh ia kane ka jingthmu.

Shuh shuh u la ong ba ha ka jingshisha ka Sorkar ka la dei ban wan sorjamin ne sorbe shuwa na ka bynta kane ka jaka ba hato ka biang ne em ban pynlong jaka theh niut ym ban shu kmen tang ba ioh jaka namar kane kan buh jingeh ia ki nonghong shnong ki ba shong ba sah ha syndah bad ka wah Umkhen.