Ka jingkieng Dawki kan hap sha Bangladesh lada ïaid ka jingker sainar ong u CEM

Syllad | The Rising MeghalayaJanuary 29, 2019

JOWAI: Ka Land Boundary Agreement 2011 kala wanrah ïa ka jingduhnong kaba khraw ia ka jylla bad lada ai lad ïaka jingker sainar shiah ha Indo-Bangladesh kumba long mynta ka jingkieng Dawki kala ban poi noh sha Bangladesh, ong U Chief Executive Member jong ka Khasi Hills Autonomous District Council (KHADC) U Bah Hispreaching Son Shylla.

U la ther tyngeh ïa u Chief Minister barim ka jylla u Dr. Mukul Sangma, Deputy Chief Minister Bah Prestone Tynsong bad Education Minister U Bah Lahkmen Rymbui kiba long dkhot ha ka kynhun ba synran ïa u Prime Minister barim ka Manmohan Singh ha ka por ba soi ïaka Land boundary agreement ha 6.9.2011 namar ba ki khlem khmih bha ïa u pud u sam ka jylla.

Shuh shuh u Bah Shylla u la ong ba Ka KHADC ka dawa na ka Sorkar Jylla ba ka dei ban pynsangeh mardor ïa ka jingker sainar ha ka khappud Indo-Bangladesh kaba hap hapoh ka East Khasi Hills District namar ba ki paidbah jong ka jylla kin sa duh bunbah ki jaka puta jong ki.

Haba iakren bad ki lad pathai khubor ha ka Sngi Ba Ar hadien ka jingleit jurip ia ka jingker sainar ryngkat bad ki nongialam ki CCIB, U Chief Executive Member jong ka KHADC u la ong ba yn sa phah da ka jingthoh lashai ka sngi sha ka Deputy Commissioner ka East Khasi Hills District ba ka dei ban pynsangeh mardor ia ka kam ker sainar.

Tang ka jingaibit ne NOC na ka KHADC kim khlem shim, U Bah Shylla ula ong ba lada ka Sorkar kam pynsangeh ia kane ka kam ker sainar la bha ban pynduh pyndam noh ia ka District Council.

Ha katei ka jingleit jurip bad ki nongialam ka CCIB, rangbah shnong, trai jaka bad kiwei de naduh Lyngkhat shaduh Dawki, u CEM ka KHADC u la shem ba la shah iuhroit ia ka hok tynrai jong ki nongshong shnong jong kine ki jaka da ka Sorkar.