Ka jingkren u Dy CM ka bym don nongrim, dawa ka HNLC iaka sorkar ban weng ia baroh ki kyndon pyrshah ia ki nongialam jong ka

Syllad | The Rising MeghalayaSeptember 5, 2023

Ka Seng Hynniewtrep National Liberation Council (HNLC) haka sngi Nyngkong ka la iai ban halor ka jingdawa na ka sorkar ba kan weng noh ia baroh ki case pyrshah ia ki nongialam jong ka kaba iasyriem ruh halor kaei kaba ka sorkar Nagaland kala leh ha kaba iadei bad ka seng NSCN (IM) ha u snem 2002.

“Ka sorkar kam dei satia ban shukor ne ialam bakla ia ka HNLC. Ngi khmih lynti ia ka sorkar ba kan weng noh ia baroh ki case, kata kaba iasyriem bad kaei kaba ka sorkar Nagaland ka la leh ha u snem 2002. Lada ka sorkar Nagaland ka lah ban leh, balei ka sorkar Meghalaya kam lah ban leh kumjuh?” ong u kyrwoh ba la phah da u general secretary uba dei ruh u publicity secretary jong ka seng HNLC u Bah Sainkupar Nongtraw.

Da kaba shim ia ka jingkren jong u Dy CM uba khmih ia ka Tnat Home (Police) kum ka jingkren sain hima ka bym don nongrim, u Bah Nongtraw u la ong; “Ha ka jingkren jong u Bah Tynsong halor ka jingkhot hajir jong ka iingbishar ia Nga kum u general secretary, kane ka paw shai ba ki jingkren ki jong u ki dei ki jingkren kam sain hima ki bym don nongrim. Ka jingkylli kaba mih ka long: Mano ba bat ia ka bor ban shim ia ka rai kaba khatduh ha kaba iadei bad ka jingthung ia ki nongbishar ne judges jong ka iingbishar Supreme Court bad High Court? Ka long ruh ka rukom ba ia ka bor na ka bynta ban pynioh ia ka jingmap ei na ka bynta kano kano ka kynhun ba la shah khein beain ka shong ha ka jingshim rai da ka tnat jong ka sorkar.”

Shuh shuh u la ong ruh ha kiba bun ki ri, dei u khliehduh jong ka ri lane jong ka sorkar, kata kum u President ne u Prime Minister kiba don ia ka bor ban leh ia kino kino ki kam isynei bad map ei.

U Bah Nongtraw u la ong ruh ban pyni ia ki nuksa kiba iadei bad ka seng NSCN (IM), kata shwa ba ki nongialam jong ki Naga kin rung sha ka jingiakren ha u snem 2002, ka sorkar Nagaland ka la weng noh ia baroh ki case pyrshah ia ki.Kata ban pynpaw halor ki jingjia halor mano ba don ia ka bor ban map na ka bynta u general secretary ka Mizo National Front?

“Lada u Bah Tynsong u shah buh jingkylli halor ki kam pyntriem, ka jubab jong u ka long pyrshah ia ki jingkren jong u CM, ki heh ka MHA bad u AK Mishra uba ieng pdeng na ka bynta kane ka jingiakren. Na ka liang u Tynsong u la ong ba ki kam bymman ki dei hi ki kam bymman, kata khlem da pynshong nongrim ha kaba iadei bad ka jingkhia jong ki kam pyntriem,” u la ong shuh shuh.

Da kaba kynnoh ba ka don ka jingthmu ba rieh ban pynap shrip ia ki nongialam jong ka HNLC, u Bah Nongtraw u la ong; “Lada u Bah Tynsong u pynpaw ba kane ka sienjam jong ka iingbishar ka dei tang ka rukom ban pyndep, hato kane ka mut ba lada u chairman ne general Secretary kin ioh pdiang ia ka hukum ban shah kem na ka liang ka sorkar kan ym don ia ka bor ban tuklar namar ka jingiapher ha ka bor kaba ki don hapdeng ka executive bad ka  judiciary? Lada na ka liang ka sorkar da shisha kam lah ban shim ia kino kino ki rai, kumta ruh kane ka dei ka jingthmu pynap shrip kaba la iasylla lypa.