Ka jingkynnoh kolshor VIP halor ka jingiap aksiden u samla ka dei ka kam thok: Paul Lyngdoh

Syllad | The Rising MeghalayaNovember 19, 2024

U Myntri ka Tnad Tourism u Bah Paul Lyngdoh ha ka 18 tarik u Naiwieng u la ong ba ka jingkynnoh halor ka jingjia tyngkhuh kali kaba la shim ia ka jingim jong uwei u samla ha Ri Bhoi District kum ka kolshor VIP (VIP Culture) ka dei tang ka kam thok kam shukor.

Kane ka jingpynpaw ka jong u ka la wan long hadien ba ka jingdawa ka la jur bha na kiba bun balang ban pynkut noh ia ka kolshor VIP hadien ka jingkynnoh kaba iadei bad ka jingrat jong ka kali pulit kaba synran ia ki kali VIP ia kawei ka kali shaka ha ka sngi pynkut ia ka Tamasa Cherry Blossom kaba la wanrah ia ka jingiap jong uwei u samla bad ka jingmynsaw ia kawei pat kaba shong lang bad u.

Haba kren sha ki lad pathai khubor u Bah Paul u la ong, “Sngewbha buh ia ka jingmut da kaba pyndonkam ia ka jingpyrkhat jong phi ia kaei kaba shisha ka lah ban jia. Ki kali VIP ba la ialam da u Myntri Rangbah ka Jylla u Conrad Sangma kaba la hap ban poi ha ka por 6:30 janmiet hynrei kaba la hap ban poi ha ka por 6:45 janmiet namar ka jingkhapngiah.

U la ong ruh ba ka kali jong u ka la bud nadien nadien ia ka kali jong u CM bad ki la don sa kumba 7-10 tylli kiba bud nadien.

“Ngi la hap ban ieng ha kiba bun ki bynta namar ka jingbun briew kaba la wanrah ruh ia ka jingdheng kali kaba jur. Kumno ka lah ban long ba kin don ki kali pulit kiba synran ki ban pynher sted bad ban tynrah iano iano ha kaba kum kane ka jinglong jingman kaba ngi la sahkut bad poi slem sha katei ka jaka?” U la buh jingkylli.

“Hynrei, haba phi ia nujor ia kata bad u nongniah kali uba shong da ka ar shaka kan kham suk shibun ia u ba un lah ban pynher, ban tynrah ia ka kali pulit synran bad shah tynrah ha kawei pat ka kali, kata ia kaba la pynpaw ha nga da ki katto katne ngut ki briew. Kumta kane kam don ei ei ruh em bad kata ka kolshor VIP,” pynksan u Bah Paul.

U la ong ruh ba ka Jylla ka hap ban bud ryntih ia ki katto katne ki kyndon khamtam haba phi don ia u Myntri ka Sorkar Pdeng uba wan jngoh ia ka Jylla.

“Ngi la dei ban poi sha katei ka jaka ha ka por kaba biang khlem da pynthut ia ki paidbah. Kumta ruh ka jingshisha kaba iadei bad kane ka jingjia aksiden ka long shisha kaba sngewsih, hynrei to buh ia kane ha ka jingmut ba ym shym la don uwei ruh na ka kynhun ki kali synran ki ban tynrah ia u nongniah ak shaka namar ngi la hap ban ieng bad iaid suki jai namar ka jingkhapngiah,” bynrap u Bah Paul.