Ka jingkynnoh tuh dieng iaki nong Mukroh kalong kaba ialam bakla: KSU

Syllad | The Rising MeghalayaMarch 14, 2023

Ka KSU West Jaintia Hills District Unit kala ong ba ka jingkynnoh tuh dieng iaki nong Mukroh da u Myntri Rangbah ka Assam bad ki pulit kam khlad bad ki Pulit ka Assam iaki nong Mukroh ka long kaba ialam bakla.

U Laitphar Syngkrem, President KSU West Jaintia Hills District Unit ula ong ba ka jingkynnoh u Myntri Rangbah ka Assam Himanta Biswa Sarma ka long kaba khlem nongrim bad ula ong ba ka Mukroh naduh ba la kha iaka jylla Meghalaya ha u snem 1972, ka shnong Mukroh ka dei kaba sah tang da ki Khasi-Pnar.

U Laitphar ula ong ba ka jingkam u Dr. Himanta ba ka Mukroh ka hap hapoh ka district West Karbi Anglong, Assam hapoh ka iing dorbar ka Assam bad ka jingkynnoh ba ki Assam Forest Protection Force bad ki Assam Police ki la iakynad bad ki nongtuh dieng ka dei kaba shu thaw bad ialam bakla ia u paidbah. Ula ong ba ka jingshisha hi ka long ba ha ka riti ka dustur u Khasi ka khlaw ka dei jong ka shnong, ne ka raid ne ka elaka kaba mut ka dei ka jong u paidbah ym jong kano kano ka sorkar.

Ha man la ki khlaw ha ka Bri U Hynñiewtrep ki bym hap ha ki kyndon pyrkhing ‘Law Adong, Khloo Blai, ‘Law Shnong, ki nongshong shnong ki lah ban thoh dieng katkum ka jingdonkam ka jong ki. Kumjuh ruh ha Mukroh ki paidbah ki leit thoh dieng na ki khlaw jong ka shnong ban pyndonkam ia ki, bad ka dei ka hok ka jong ki naduh ki por u mynbarim u mynbajah bad ki sorkar khamtam ki sorkar nongwei kim don hok ban kam trai ne tuklar ia ka nongkynti ki Khasi-Pnar, la ong u Laitphar.

U Syngkrem ula ong shuh shuh ba ka jingkam u Myntri Rangbah ka Assam ka long kaba bakla shibun eh bad ka pynpaw ba u kwah kam ei ia ka khlaw shnong ki nongshong shnong ka Mukroh bad kumjuh ruh ia ka shnong Mukroh baroh kawei.

U ne u nongialam ka KSU ula ong ba ki paidbah nongshong shnong ka Mukroh ha ryngkat ki paidbah ka West Jaintia Hills lem bad ki paid ka Bri U Hynniewtrep baroh kawei kin ym ailad da leilei ruh wat tang shi inshi ka jaka u Khasi kan leit sha Assam. Ka KSU WJHDU ka kyntu ruh ia ka sorkar Meghalaya ba ka dei ban leh eiei halor katei ka jingkam namar ka pyni ba wat hapdeng ka jingiapynbeit pud ki ar jylla, ka Assam im im peit peit ka iai kam trai beit ia ki shnong Khasi ha man la ki jaka ba don ha khappud.