Ka jingkynrei u Drok ha nongbah Shillong ka dei ka jinghiar thma ba jar jar ki mynder ia ka jaidbynriew: vice president FKJGP

Syllad | The Rising MeghalayaNovember 6, 2023

“Ka jingkynrei u Drok ha ka Nongbah Shillong ka dei ka jinghiar thma ba jar jar jong ki mynder ia ka jaidbynriew,” ong u vice president FKJGP central body samla Kitboklang Nongphlang, haba kren ha ka jingialang pynskhem nongkitkem hapdeng ki nongialam ki Circle kiba don ha ka nongbah Shillong kaba la long ha ka 3 tarik mynta u bnai ha ka ophis treikam jong ka ha Mawlai Kynton Massar.

U la ong ruh ba kane ka la wan long namar kiba bun ki samla khasi kiba ngop ha utei u jingdih pynbuaid ki dei tang ki langknia katba kiba pynpoi bad pynngop pat ia utei u jingdih bunsien ki dei beit ki khyllah jait. U la ong ruh ba kum ki dkhot jong ka seng ki dei ban long kiba phikir, kiba peitngor bad ban long kiba la khreh ban iakhun pyrshah ia ka Thma Drok kaba la bam kruin ia ka jaitbynriew.

La pynlong ia kane ka jingialang kaba kyrpang hadien ka jingwan pyniasoh da ki spah ngut ki khun samla na ki bynta bapher bapher jong ka Nongbah Shillong. Ka Seng  kala lum ia kane ka jingialang ban shim ia ki sienjan ban pynkhlain ia ka rukom treikam jong ka seng khamtam eh ha ka nongbah Shillong.

Ia kane ka jingialang la pyniaid da u bah Khrawkupar Nongsiej, Chief Organising Secretary FKJGP Central Body ha kaba la ia don ryngkat ruh da u khlieh nongialam jong ka seng u Bah Dundee Cliff Khongsit, President, Senior Vice President bah Elton Cliff Warjri, Samla Kitboklang Nongphlang, Vice President bad U Bah Eldie N Lyngdoh, General Secretary.

Katba u Bah Elton Cliff Warjri, Senior Vice President ha ka jingkren u la pynkynmaw ia ki lynti iaid jong ka seng ha ki snem 2014 ter ter ha kaba ki dkhot ki dei ban don ia ka mynsiem kaba shitrhem ban shakri ia ka jaidbynriew hi baroh kawei.

U Bah Eldie N Lyngdoh, General Secretary Central Body uba la long teng ruh u General secretary FKJGP Shillong City ha u snem 2024 u la pynkynmaw ba ki dkhot jong ka Shillong City ha kitei ki snem kila mad ia shibun ki jingshah tynjuh lyngba ki jingshah kem, shah bom shah tied haba ki pyrshang ban iakhun ia kiba bun ki mat ne issue na ka bynta ka dawbah jong ka jaidbynriew hynrei kaba sngewtynnad pat ka long ba haduh mynta ka nongrim ka skhem bad kam lah satia ban theh umpjah ia ka mynsiem ieit ri ha kaba u la kyntu ruh ia ki dkhot ba kin nang iai trei shitrhem shuh shuh ban aiti met bad mynsiem na ka bynta ka jaidbynriew.

Hashwa ban pynskhem ia ki nongkitkam ba thymmai jong ka FKJGP Shillong City na ka liang jong u Bah Dundee Cliff Khongsit, President FKJGP Sengkmie ula pynshai ia ki nongrim bad ia ki mat treikam jong ka seng ha kaba u la long ruh ba shisien ba phi la pyniaisoh ialade bad ka FKJGP to tip shai ba shiliang ka kjat kala dei ban don lypa ha ka along bad shiliang pat shabar, ha kaba ula kyntu ruh ba kum ki dkhot kidei ban don ia ka mynsiem kaba shynrang ka bym tieng, bym khawpud bad ka mynsiem kaba ym pyndem satia ban iakhun na ka bynta ka dawbah jong ka jaidbynriew ha kaba u la maham pat ba ki dkhot jong ka seng kim dei satia ban long ki khwan myntoi na ka bynta ka malade.

Ki Nongialam bad ki dkhot bala shah pyntian smai na ka bynta ka samoi treikam 2023-26 jong ka FKJGP Shillong City ki kynthup ia u President  Arkinfield Khonglam, Vice President Simon Myrthong, General Secretary Shane Nongrum, Joint Secretary Wanpyndap Marbaniang, Assistant General Secretary Kyrshan Syiemlieh, Organising Secretary Alfredy Kharbuli, Barilang Pyngrope, Donkupar Dympep bad Dapkmen Syiemiong, Information Secretary Embhahlang Talang, Assistant Information Secretary Sherborn Shabong, Education Secretary Garry N. Thangkhiew, Assistant Education Seecrtary  Boney Jyrwa, Socio & Cultural Secretary Larikupar Lyngdoh, Assistant Socio & Cultural Bantei Nongkhlaw, Sports Secretary Donavan Pyngrope,  Assistant Sports Batkupar Nongkhlaw, Disciplinary Secretary Rist Thabah, Asst. Disciplinary Secretary Kordor Lyngdoh, Environmental  Secretary Hopewell Kharkongor,  Assistant Environmental  Collin Trunia, Agriculture Secretary  Arban Katrai, Assistant Agriculture Mark Wahlang.

Nalor jong kine ki nongkitkam la jied ruh ia kiwei pat ki 36 ngut ki dkhot na kylleng ki jaka kiba hap ha Sor bad Khapsor kum ki dkhot sha ka Executive Committee jong ka FKJGP Shillong City.