Ka jingkynthoh Niam ka VPP kam don jingiapher na ka BJP, ong u Bah Pala

Syllad | The Rising MeghalayaMarch 22, 2024

U President ka Meghalaya Pradesh Congress Committee (MPCC) uba dei ruh u MP ka Shillong u Bah Vincent H Pala ha ka 21 tarik mynta u bnai u la ther tyngeh ia ka Seng Voice of the People Party (VPP) namar ki jingkynthoh ia ki nongialam Niam/Balang ba ki sam kyiad ha ka por ilekshon, kata da kaba ong kam don jingiapher na ki nongrim treikam jong ka Seng Bharatiya Janata Party (BJP).

Haba kren sha ki lad pathai khubor, u Bah Pala u ban iakhun ha kane ka Lok Sabha ilekshon ka ban long ha ka 19 tarik u Iaiong u ban wan u la ong ba ka VPP ka la dei ban pynithuh ia kita ki nongialam Niam kiba donkti ha kiba kum kitei ki kam bymman ha ka jaka ban pynthohbria ia baroh ki Balang bad ki nongialam Niam.

 U Bah Pala u la ong ruh, “Ka long kaba sngew bynniaw ba ka VPP ka la sdang ban kynthoh ia ki nongialam Niam. Ka shim por da ki snem ban long u Tymmenbasan namar ka shim por shibun ia ki briew hapoh ki shnong lane ka Balang ba kin ithuh mano ba dei ban long Tymmenbasan. Nga tharai lada ka VPP ka shlur ban leh ka dei ban pynithuh ia kita ki briew kiba leh kum ia kita ki kam bymman khnang ba ka Balang kan shim ia ka jingpynshitom.Da kaba shu ong Pastor, Father ne Tymmenbasan kiba donkti kam long kaba dei.Ka long kaba suk ban kynthoh, hynrei ka long pat ka jinglehrain lada ym lah ban pynshisha.”

“Lada ka Balang ka troin ka imlang sahlang ruh ka troin. Lada ka Balang ka khlain ka imlang sahlang ruh ka khlain. Lada ki nongialam ki khlain ka balang ruh ka khlain, lada ki nongtrei ki khlain ka imlang sahlang ruh ka khlain,” ong u Bah Pala.

“Nga sngew  ba ka VPP ka dei ban pan map na ki Balang/Niam lem kumta ka jingkynnoh ia ki Balang/Niam kan ktah ia ka burom jong ki Balang/Niam ym tang ha Meghalaya hynrei ha ka Ri baroh kawei. Ka dei kaba bakla, Nga sngew ba ka jingkren khlem pyrkhat ka dei ban sangeh noh namar ka ialam bakla ia u paidbah” ong une u MP.

Shuh shuh haba kylli une u nongialam Congress u la ong ba ka VPP bad ka BJP ki don ia ki juh ki rukom treikam, kata ban pyntroin ia ki balang/niam, ia ka imlang sahlang bad ia ki party sain hima.