Ka jingkynthoh niam pyrshah iaka Seinraij Tuber ka dei ka jingthmu pyniapher niam hapoh ka Raij

Syllad | The Rising MeghalayaJuly 21, 2021

Ka shnong Tuberkmaishnong kadei ka nuksa kaba kiwei ki shnong ki dei ban bud namar ba kane ka shnong wat la bun eh ki longiing ki dang ksoh dang bat ïaka niam tynrai ne Niamtre, pynban kam don kano kano ka jingsngew iapher niam hapoh kane ka shnong ne ka Raij hi baroh kawei.

“95 percent ki nongshong shnong tang haka shnong Tuberkmaishnong ki dei kiba dang ksoh iaka Niamtre Niam Khasi bad kam don satia kano kano ka jingiapher niam bad kiwei pat ki kynhun niam la ka dei ka Presbyterian ne ka Katholik bad kiwei kiwei. Kiba bun hi ki nongshong shnong ki im laitluid haka jingngeit bad ia burom iwei ia iwei bad haba don kino kino ki prokram la ka dei ka Christmas ne ka Behdieñkhlam ngi iarap markylliang haki kam ki jam,” la ong u nongshong shnong bad u nongaibut ka dorbar shnong Tuberkmaishong, U Ma Wanthmu Phawa.

“Ka jingkynthoh uwei na ki briew haka khubor paidbah uba tip kyrteng kum Living Rymbai pyrshah iaka rukom ksoh niam bat niam bad beiñ iaka Niamtre ka dei ka nuksa kaba sniew bha kaba pynsngewsih ia baroh kawei ka Raij Tuber,” ong u ma Phawa.

Kane ka jingkynthoh niam da une u Living Rymbai kala paw pyrthei haka sngi ba Ar halor ka Behdieñkhlam Tuber kaba la kut haka 19 tarik une u bnai.

U Ma Phawa ula “Kane kam dei ka jingbakla ka dei ka jingleh khnang jong une u Living ban wanrah ka jingiapher niam, ka dei ka jingleh khnang bad kum kine ki jingkynthoh kala jia dangshen ha Jowai ha kaba uwei u briew ula kynthoh iaka Seinraij Jowai.”

Ka por kala dei eh ba ka bor jong ka aiñ ka dei ban pynshitom ia kum kine ki briew kiba pyrshang ban ktah iaka shongsuk shongsain, la pynkut u ma Wanthmu Phawa.

Ka shnong Tuberkmaishnong baroh kawei kala pynrem jur ia u ne u briew bad kala ban khia iaka bor jong ka aiñ ban pynshitom da kaba tyngeh ia kum kine ki briew kiba pyrshang ban pyniapher niam bad pyniapher jaitbynriew.