Ka jingkynthoh ‘Pain Killer’ kadei ka jingkren tohmet; Ka kam jngohkai ka kyntiew ia ki briew jong ngi: Paul

Syllad | The Rising MeghalayaDecember 16, 2024

U Myntri Sorkar Jylla uba khmih ia ka Tnad kam jngohkai pyrthei, u Bah Paul Lyngdoh u la pynpaw ka jingsngew bynniaw ha kaba iadei bad ka jingkren tohmet jong u nongialam ka seng Voice of the People Party (VPP) u Bah Ardent Miller Basaiawmoit uba la kynnoh ba ka jingpynlong ia ki tamasa iaput iatem da ka Tnad jngohkai ka long tang kum ki dawai ‘Pain Killer’ ban pynklet ia ki paidbah halor ki kam bamsap jong ka sorkar.

Haba jubab bad pynphai nia halor kine ki jingkynthoh u Bah Paul u la pynpaw ha ka jingkren sha ki lad pathai khubor ha ka 14 tarik Nohprah da kaba ong ba kane ka jingkren u president ka VPP ka pynpaw ka jingbym don ia ka jingkitkhlieh namar ka Tnad jngohkai ka dei kawei na ki lad ka ban kyntiew ia ka kamai kajih bad ka ioh ka kot jong ki trai shnong ka Jylla.

U la ong ruh ba ka jingwan iashim bynta da ki kynhun nongtem nongrwai ba pawkhmat ka pyrthei sha kane ka jylla, khamtam dang shen eh ka jingwan jong u nongrwai ba pawnam na Canada u Bryan Adam ka la pynpaw ia ka nam jong ka Nongbah Shillong bad ka Jylla hapdeng ki nongshangkai pyrthei kiba la wan jngoh sha kane ka jylla bad kaba la kyntiew shibun ia ka kamai kajuh bad ka ioh ka kot hapdeng ki nongshong shnong ka Jylla.

“Ngi don ia ki jingshisha kiba kyrshan ia ki jingpyrshang jong ka sorkar ban kyntiew ia ka kam shangkai pyrthei bad lah ban iohi ba tang na kawei ka concert jong u Bryan Adam ia kaba u la post lyngba ka Instagram jong u kaba don da ki million ki nongbud ia ka jingwan iashim bynta ka jong u ha Shillong, kata kaba mut ba ki briew ha kylleng satlak ka pyrthei ki bym pat ioh sngew ia ka kyrteng jong ka Shillong mynta ki la tip shaphang jong ka, kumjuh kumba long kiwei kiwei pat ki kynhun nongrwai ba pawnam kiba la wan iashim bynta sha kane ka jylla” ong u Bah Paul.