Ka jingmih ka jingiakynad hapdeng ki samla pule kam don jingiadei bad ka jingsngew iapher jaidbynriew: NEHU

Syllad | The Rising MeghalayaSeptember 20, 2023

Ka  North Eastern Hill University (NEHU) haka sngi ba Ar ka la ong ba ka jingmih jong ka jingiakynad hapdeng ki samla pule kiba shong hapoh ka hostel kaba la jia ha ka miet sngi Nyngkong ba la lah kam don satia kano kano ka jingiadei halor ki mat jong ka jingiakynad jaidbynriew.

Hynrei, kane ka jingiakynad kaba kynthup ia ka jingiania bad ka jingiaktahkti hapdeng ki samla pule kiba shong hapoh hostel ka don jingiadei halor ki jingbym ia mynjur ia ki kyndon shong hostel. Hadien kane ka jingjia mardor la lah ban tehlakam ia kane ka jinglong jingman bad pynthikna ruh na ka bynta ka jingshngain jong baroh ki samla pule kiba ia don bynta ha kane ka jingjia.

La ong ruh ba u Dean jong ka Students Welfare, u Warden jong ka Hostel 19 bad u University’s Security Officer ki la wan poi mardor ha katei ka jaka ban tem ia ka jingiakynad.

Ki bor pyniaid ka skulbah ki pyntip  ba na ka liang ki bor pulit ruh ki la shimkhia halor kane ka jingjia bad wan poi ha katei ka jaka ban bishar bniah ia ka jinglong jingman bad iarap ban pynneh pat ia ka shongsuk shongshngain.

Na ka liang u Vice Chancellor ka NEHU u Prof PS Shukla hynne ka sngi ba Ar u la khot ia ka jingialang kaba kyrkieh ban iakren halor kane ka jingjia ha ka jingiadon lang u Registrar, u Dean uba khmih ia ka bha ka miat jong ki samla pule, u heh ka tnat pahara bad u Warden jong ka Hostel No. 19.

“Ka jingthmu jong kane ka jingialang ka long ban iamir jingmut halor kane ka jingjia bad ban pynthikna ban shim ia ki lad jingpynshitom katkum ki kyndon ain jong ka University,” ong u PRO ka NEHU u Dr Davidson Pyngrope.

“Ka NEHU ka kwah ban pyntip ba la lah ban tehlakam ia kaj inglong jingman, bad kane ka jingjia kam don satia kano kano ka jingiadei halor ka mat jong ka jingiakynad iapher jaidbynriew kumba la pynpaw da kiba bun ki tyllong khubor ki bym shisha. Na ka liang ka University ka iai bteng ban pynneh ia ka shongsuk shongshngain hapdeng baroh ki samla pule, bad kino kino ki jingleh kam bymman kin ngat ha ka jingeh katkum ki kyndon ain,” u la ong shuh shuh.

Ha kawei pat ka bynta na ka liang ki bor pyniaid ka NEHU ki kyntu jur ia ki kynhun kiba ia don bynta, kaba kynthup ia ki staff, ki samla pule, ki kmie ki kpa bad ki riew paidbah ba kin shim ia ki jingpynshai ba la pynmih na ka liang ki bor ba dei khmih jong ka University khnang ban kiar na kaba pynphriang ia ki khubor hamsaia kiba ialam bakla.