Ka jingnang jingstad ka lah ban pynkylla iaka pyrthei, ong u Sniawbhalang Dhar haka Golden Jubilee ka Mukhla Raij UP Skul

Syllad | The Rising MeghalayaOctober 31, 2024

Ki riew shemphang ki ong, ka spah pyrthei ym lah ban kit katba ka jingnang jingstad lah ban kit kat shaba leit bad kadei ruh ka atiar kaba lah ban pynkylla iaka pyrthei baroh kawei.

U Deputy Chief Minister ka Jylla u Bah Sniawbhalang Dhar ula ong ia kane haba kren kum u kongsan haka sngi pynkut iaka jingrakhe Golden Jubilee ka Mukhla Raij UP School, West Jaintia Hills District haka 30 tarik Risaw.

Haba bteng iaka jingkren u Dhar, ula pyrto iaki nongseng jong ka skul kiba iohi jngai iaka jingmyntoi jong ka jingnang jingstad bad ruh iaki kmie ki kpa kiba kloi ban bynda iaki jaka puta tang ban pynnang pynstad iaki khun kti.

Nalor u Symbud Myntri la donlang ruh u Myntri ka tnad pule puthi ka sorkar Jylla Rakkam A. Sangma, u MLA ka 2-Jowai Bah Wailadmiki Shylla, CEM JHADC Bah Thombor Shiwat, ki MDC JHADC, ki ophisar sorkar, ki nongïalam shnong bapher bapher, ki nonghikai, ki khynnah skul, ki kmie ki kpa, ki past pupil ki nongshong shnong nalor kiwei kiwei.

“Lada phi kwah ban jop bad long eiei haka jingim ka jong phi, wat khmih lynti ban don kiba leh na ka bynta jong phi, wat ki Kmie ki Kpa jong phi ruh kim lah ban leh eiei hynrei kadei ban sdang na lade”, ong u Rakkam A. Sangma bad bynrap ruh ba mynta ryngkat bad ka jingnang jingstad dei ruh ban hikai iaki khynnah ban pynneh pynsah iaka dustur ka kolshor bad ban rah shakhmat iaka jingitynnad jong ka Jylla jong ka khnang ba ka pyrthei kan ithuh iaka.

Hadien ka jingialang u Bah Sniawbhalang ryngkat ki kynrem ki lyndan kila plie ia u maw nongrim jong ka jingdap 50 snem ka Mukhla Raij UP School katba u Bah Thombor Shiwat ula pyllait paidbah iaka kot souvenir ka jingiaid lynti jong ka skul.

Ha kane ka jingrakhe u Bah Yeomanry Blah ula pule iaka khana ne history shaphang ka jingïaid lynti jong ka skul kaba la sdang naduh u snem 1974 da kaba pynkynnmaw ruh ba iaka Mukhla Raij Upper Primary School mynshwa la tip kum ka Mukhla Raij Middle English School.

Haka jingsdang ki khynnah ki don 15 ngut klas IV haduh VI. Ki nonghikai kidei u Bah Hari R. Sari kum u Headmaster, ka Kong Miket Blah, Jamly R. Bang bad Bah Wilson War Assistant Teacher kila sdang iaka kam ban hikai bad pynroi iaki jingmut jingpyrkhat kiba dang samla jong ka shnong.

Haka jingrakhe kaba 50 snem jong ka jingshakri iaka imlang sahlang mynta ka jingdon jong ki khynnah ka long 700 ngut.

Kane ka jingrakhe ka la long kaba iphuh iphieng da ka jingshim bynta ki khynnah skul haki jingrwai bad jingshad.