Ka jingngeit biej ka dei ka daw ba duna ka jingai tika IMI: Pyniaid

Syllad | The Rising MeghalayaFebruary 7, 2022

U Bah Pyniaid Sing Syiem, Deputy Chief Whip ka Sorkar Jylla ula ong ba ki ki kmie ki kpa ki don ka bynta kaba kongsan ban pynioh iaka imlang ka sahlang kaba koit kaba khiah bad na ka bynta ioh iaka ioh iaka koit kaba khiah ba pura, ki kmie ki dei ban wan shakhmat ban shimkabu iaki jingai dawai tika ka sorkar.

“Ka tika kaba ai ka sorkar sha ki kmie bad ki khyllung kadei kaba donkam bha na ka bynta ka miat kabha jong ka kmei bad ki khun,” la ong u Bah Pyniaid Sing Syiem haba kren kum u kongsan haka jingsdang iaka jingai tika District Intensified Mission Indradhanush (IMI) 4.0 kaba long ha ïing dorbar ka Sohryngkham Neng, East Khasi Hills District haka sngi Nyngkong.

Ia kane ka prokram la pynlong da ka ophis District Medical & Health Officer, East Khasi Hills District.

Shuh shuh uba Pyniaid haba kren ula pynshlur iaki kmie ki kpa ban pynduh iaka jingpyrkhat bakla, ka jingngeit biej kaba dei kawei na ki daw ba duna ka jingai dawai tika iaki khyllung khynnah bad ka jingkha khun ha ki jaka sumar.

Ula kyntu iaka tnad ka koit ka khiah ban trei shitom shuh shuh ban pynlong iaki jingai jinghikai bad ka jingpynsngewthuh paibah ban batai shai iaka jingmyntoi ka jingai dawai dashin. Ula khot ruh iaki dorbar shnong ban iatreilang bad ki tnad ka koit ka khiah ban jop ka jingai dawai tika ban iada na ki jingpang ba har rukom.

Ka Dr P Manner, State Immunization Officer, Meghalaya, kala iathuh ba ka Sorkar India kala jied iaka East Khasi Hills, East Garo Hills bad West Garo Hills ban sdang iaka Intensified Mission Indradhanush 4.0 namar ba duna ka jingai ia kane ka tika na ki longkmie bad khynnah.

Kala ong ruh namar ka jingwan lynsher ka khlam COVID_19 ha kine ki ar snem ki longkmie kim shym la wan shakhmat ban ai ia kane ka tika, hynrei ka thong jong ka Intensified Mission Indradhanush 4.0 ka long ban ai iaka tika sha ki longkmie ba ar met bad ki khyllung hapoh 2 snem.

Iaka Intensified Mission Indradhanush 4.0 yn pynlong lai sien lai wat, kata 7th February (Rymphang), shi taiew lynter bad 7th March (Lber) bad 4th April (Iaiong) shi shitaiew ban kynjoh iaka thong kaba la buh ban ai tika iaki longkmie bad khyllung.

Kane ka jingthmu ka long ban ai tika ia ki khyllung bad ki kmie ha ka jylla ban iada ia ki jingpang ba kynthup pynhiar (Diphtheria), jem shyieng (Polio), Tetanus, jingpang TB (Tuberculosis), Niangpyrsit (Measles), Hepatitis B, Meningitis bad Pneumonia bad kiwei kiwei.

Kiwei kiwei kiba kren ki kynthup ia i Dr A Lyngdoh, DMHO, East Khasi Hills District, Dr EL Kharmutee, District Immunization Officer, East Khasi Hills.