Ka jingong ba lada tih uranium yn poi ka roi ka par ka dei ka jingsngewthuh bakla

Syllad | The Rising MeghalayaDecember 19, 2020

Ha kine ki sngi ngi la iohi ba la don ki politician kiba pyrkhat bad kren ba hana lada tih uranium kan wan ka roi ka par. Kane ka jingpyrkhat bad ka jingkren ka long kaba bakla na kiba bakla tam. Kum kine ki jingkren ki pynpaw ia ka jinglung ka pyrkhat bad ka dei ka jing bym sngewthuh bha shaphang ka jingtih uranium bad imat kim sngewthuh hi ruh kaei ka roi ka par (Development).

Ka jingdon ki ïïng paki dulan bad ka jingdon ki surok bah ka dei tang ka jingdon ki jingtei (infrastructure), kam pat dei satia ka roi ka par. U mawser jong kano kano ka roi ka par (development) yn thew na ka jingmyntoi aiu ki briew ki ioh na Kkta ki jingtei. La kita ki infrastructure ki pynmyntoi ne em ia ki briew kan dei ka jingthew ba khadduh jong ka roi ka par.

Lada don ki ing paki dulan, hynrei ym don ba shong briew ne sah briew ne ym don ba pyndonkam ngim ong ia kata ka ïing ka roi ka par, hynrei ngi khot ka ïing jah bad ka jing pynsyrwa ei ia ka spah. Lada don ka ïing heh, ba ha kata ka ïing heh lehse yn pyndonkam ban pyniaid ki kam awria, ngim khot ia kata ka development, hynrei ka brothel. Ia ki wine store ym ju don ba khot ka development bad kumta ter ter. Ia ka ïing skul ne hospital bad ki wei ngi khot ki development namar ki pyn myntoi ia ki paidbah. Te u mawser ba khaduh yn dei ha kano ka rukom ki ta ki infrastructure ki pyn myntoi ia ki paidbah.

Haba tih uranium nyngkong eh kin beh noh ia ki briew ba shong ha syndah ki uranium mining area namar ym long shong briew shuh. Nyngkong eh kan wan ka People Displacement ym ka development. Lada tih uranium ha thain Mawthabah bad Nongbah Jynrin ne thain Phlangdiloin, ia baroh ki briew ha kito ki thain kin beh shnong, te ka dei ka development ne ka ka displacement? Lada tei ki surok, ki ïing heh bad ki wei ka jingkylli ka long mano ban ioh jingmyntoi na kita, ka jubab ka long kaba shai ka UCIL bad ki nongtrei jong ka kin ioh pyndonkam bad kin myntoi ma ki namar ki Trai shnong la shah beh shnong lypa. Ka uranium mining ka dei ka displacement kam dei ka development bad kan pyn myntoi tang ia ka UCIL ym ia ki khun Khasi khara ne ia ka dong ka thain South West Khasi Hills District.

Ngi ki trai district ngin ioh tang ka erbih radiation, ka pang ka shitom bym lah pynkoit shuh , ki um khem dohkha, ki shyiap bym seisoh, ka ri kynjah bym long shong briew bad ngin buh ia ka pateng ban sa khanatang ha ka jinganna suda. Hato kine ki dei ka roi ka par?

Da u Arbok Kharjahrin | President | HYC | South West Khasi Hill District