Ka jingpang Bampong kan kiew 12% ha ka ri India ha u 2025, ha North East ka kynrei na ka dih duma ong ka kaiphod ka ICMR – NCDIR

Syllad | The Rising MeghalayaOctober 15, 2020

Ka report jong ka National Cancer Registry Program 2020 ba la pynmih da ka Indian  Council of Medical Research ( ICMR ) ka bad National Centre for Disease Informative and Research ( NCDIR ), Bengaluru ka buh antad ba ha u snem 2020 ka jingpang bampong (Cancer) ha ka ri India kan poi 13.9 lak bad kane ka lah ban kiew pat sha ka 15.7 lak ha u snem 2025 lada bishar kat kum ka jinglong jingman kaba mynta. 

Kine ki jingantad ki long katkum ka jinglum jingkhein halor  kane ka jingpang ba la lum da ki 28 tylli ki jaka lum jingtip bad buh jingkhein ia ka jingpang bampong, ki Population Based Cancer Registries (PBCRs) bad 58 tylli ki Hospital Based Cancer Registries (HBCRs) kiba don ha kylleng ka ri India.

Ha u snem 2020, la buh antad ba kane ka jingpang bampong kaba mih  na ka daw jong ka jing pyndonkam ia u duma ( tobacco related Cancer ) kan long kumba 3.7 lak,  kaba mut 27.1% na baroh ki jaid jingpang bampong.  Ha ki kynthei  ka jingpang bampong jong ki jymbuin la buh antad ba kan long 2.0 lak ( 14.8 % ) bad jong ka plakhun kumba 0.75 lak (5.4 %).  Haba shim kyllum lang  shynrang bad kynthei , ka jingpang bampong jong  ka kpoh la buh antad  kan long 2.7 lak,  kata 19.7 %  na baroh ki jingpang bampong.

Ka jingpang bampong salonsar ha ki shynrang ka bun tam ha Aizawl, Mizoram kata kumba  269.4 (Ka jingkhein ba pyniapher katkum ka rta- AAR) bad duna tam ha Osmanabad & Beed, Maharashtra kata kumba 39.5 ka jingkhein ba pyniapher  bad ka rta ha man ka 100,000 ngut ki nongshongshnong. Kumjuh ruh ka jingshim jingkhein na ka bynta ki kynthei ka bun tam ha Papumpare District, Arunachal Pradesh kata kumba 319. (Ka jingkhein ba pyniapher  kat kum ka rta- AAR) bad duna tam ha Osmanabad & Beed, Maharashtra kata kumba 49.4 (Ka jingkhein ba pyniapher  katkum ka rta- AAR) ha man ka 100,000 ngut ki nongshongshnong.

Ka jingpang bampong na ka jingpyndonkam ia u duma (tobacco related Cancer) ka kynrei bha ha ki thain Shatei Lam mihngi (North East India) jong ka Ri bad ka kham bun ha ki shynrang. Kumjuh ruh ka jingpang bampong jong ki tor (lungs), shyntur (mouth), kpoh (stomach) bad tangkro (oesophagus) ka kham kynrei bha ha ki shynrang, bad ha ki kynthei pat, ki jymbuin bad ka plakhun ki long ki dkhot met kiba kane ka jingpang ka ktah bha. Kadon ka jingkiew jong ka jingpang bampong jong ki jymbuin ha ki kynthei, ka  jingkiew ruh jong ka jingpang bampong jong ki tor (lungs) bad ki bynta ka khlieh bad ryndang (head and neck) , hapdeng ki shynrang bad kynthei kumjuh ia kaba la shem ha man ki registries ha kylleng ka Ri. Lah shem ruh baka don jinghiar jong ka jingpang bampong jong ka pla khun.

Katkum kane ka thup lum jingtip, la shem ba ka East Khasi Hills District jong ka jylla Meghalaya ka don kham bun ka jingpang bampong ha kito kiba pyndonkam ia u duma ( tobacco related Cancer); kumba 70.4 na ka shispah ha ki shynrang bad 46.5 na ka shispah ha ki kynthei ki ioh ia kane ka jait jingpang bampong. Hapdeng ki shynrang, la shem ba ka jingpang bampong ka duna bha ha West Arunachal Pradesh (24.5 na ka shispah) bad ha ka liang ki kynthei kaba duna bha kadei ha Thiruvananthapuram district, Kerala (10.2 na ka shispah). Ka jingbun jong ki nongpang bampong na ka jing pyndonkam ia u duma ha ki kynthei ka bun eh ha ki phang shatei lam mihngi jong ka ri bala bud da kiwei pat ki registries badon ha ki bynta ba hapdeng bad sepngi jong ka Ri India.

Bunsien, ka jingpang bampong  jong ki  tor (lungs)  haba lap ne shem kala long dier  por kata ynda ka lah saphriang sha kiwei pat ki dkhot met  (distant metastasis ). Ha kawei pat ka liang ka jing saphriang jong ka bampong kaba ktah ia u ryndang, ka kpoh, ki jymbuin bad ka pla khun ka saphriang tang ha ki dkhot met ba iajan. Ban sumar ia ka bampong jong ki jymbuin bad kumjuh ruh jong ka khlieh bad ryndang la leh lang da kaba puid, dih dawai bad da kaba syang (radiation). Ka rukom ai jingsumar ia ka bampong jong ka pla khun la leh da kaba ai dawai bad kaba syang bad kumta ter ter, bad ia ka jingtip kaba kham bniah lah ban shem na ka website: http://ncdirindia.org//ALLreports/Report2020/default.aspr.

Ka  ICMR  ka  la sdang ia ka National Cancer Registry Programme ha u snem 1982 hapoh ka jingpeit jong ka National Centre for Diseases Informatics & Research,  Bengaluru.  Ki tnat treikam jong kane ka office kata kum ki Population bad Hospital Based Cancer Registries (PBCRs & HBCRs) ki lum jingtip halor ka jingdon ki nongpang bampong, ka jingiap na ka bad ki rukom jingsumar ba ki nongpang ki ioh. Kine ki jinglum jingtip pat ki iarap kumno ban iada (prevention) bad ban tehlakam ia kane ka jingpang ha ka jylla bad ka ri hi baroh kawei.

Kum shi bynta jong kane, la sdang ruh ia ka Population Based Cancer Registry (PBCR), ha Civil Hospital Shillong bad dang shen la sdang ruh ia ka Hospital Based Cancer Registry (HBCR) ha NEIGRIHMS Shillong.

Khyndiat shaphang Ka ICMR – NCDIR: Ka National Centre for Disease Informatics & Research (NCDIR) ka dei kawei na ki shlem treikam hapoh ka ICMR, kaba long ka ophis kaba ha khlieh tam haka ri kaba wad bniah ia ki jingpang jingshitom. Ka jingthmu  jong ka, ka long ban pynbiang ki jingtip/ban ai ki jingtip kiba tikna, bad ban kyrshan ha ka jingpyn wan dur ia ki rukom treikam , ka jing bud dien ( monitor ) ia ki rukom treikam bad ban pynshong nongrim ia ki rukom treikam kaba iadei bad ka koit ka khiah. Ka NCDIR ka khmih bniah ia ki jait jingpang ki bym ia bit, kata kum ka bampong, ka pang shini, ka jingpang klong snam bad thied snam bad ka jingpang iap shiliang namar ba bthei thied jabieng. Ka NCDIR ka pynwandur, da kaba ia shim bynta bad  pyntreikam ia ki rukom ba bun jait katkum ki jinglap ki jingtip kiba thymmai, ban pyniaid/ban pyntyllun ia ki prokram ba pher ba pher kiba iada bad ai jingsumar ia ki nongpang. Ia ki jingtip ba kham bniah phi lah ban shem ha ka website https://www.ncdirindia.org/

Shaphang ka ICMR: Ka Indian Council of Medical Research (ICMR), New Delhi, kadei ka ophis trei kam kaba ha khlieh duh jong ka koit ka khiah ha Ri India kaba wad ia ka lad ka lynti, ban peit ia ka jingiaid beit iaid ryntih bad kaba ia leh ban pynkiew ha ka liang ka jingwad bniah ia ki lad jing pynkhiah bad ka dei ruh kawei na ki ophis treikam kaba la rim bha ha ka pyrthei. Ki bynta ba ka ICMR ka wad bniah ki iahap bad ki jongdonkam kiba ha khmat eh, kiba ka jaitbynriew baroh kawei ka donkam. Ha kane ka jingpang COVID-19 kaba la ktah ia ka pyrthei baroh kawei, ka ICMR kala shim bynta ban lam lynti  ia ki jaka test jong ka sorkar kumjuh ruh jong ki riew shimet kumno ba kin leh ia ki test kaba long ka jing pyntikna ba ka Ri India ka lah ban ialeh pyrshah ia kane ka jingpang COVID-19, bad kumno ban lap ruh ia ki lad ki lynti ban iada bad ban ai jingsumar ia kiba pang kum ia kane ka jait jingpang. Ban ioh jingtip bakham bniah phi lah ban leit sha ka website http://icmr.gov.in

Phi  lah ban ioh jingtip kham bniah na ka website – https://www.ncdirindia.org/ bad na ka address harum:

Director, ICMR – National Centre for Disease Informatics and Research,
II Floor of Nirmal Bhawan, ICMR Complex, Poojanhalli Road, Off NH-7,
Kannamangala Post, Bangalore – 562 110. India,
Email: [email protected]