Ka jingpang COVID-19 kam pat kut, ka Jowai kan hap ïakhun sa ka khlam jaboh jabaiñ

Syllad | The Rising MeghalayaMarch 30, 2021

Haduh mynta ka sngi la kynjoh 10 sngi ka jingsangeh pyllang ñiut ka Jowai Municipal Board (JMB) bad ki ñiut kiba la pynlang pynlum na ki basa iew bapher bapher Jowai kila dap smam bad wanrah iaka jingsma iwtung.

Wat ki longïiing bapher bapher kiba hap haka shnong Jowai ruh kim shym la ïohlad ban bret iaki ñiut kiba la lumthup ha ki ïing ki sem jong ki.

Kane ka kala jia hadien ba ki 7 shnong bad ka Khasi Students’ Union (KSU) Mupyut bad ka War Jaintia Cricle ki mih paidbah haka 19 tarik une bnai ban pyrshah ïaka jingtheh ñiut ha Mynkjai, ka jaka theh ñiut ka Jowai da kaba kynnoh ba JMB bad ka JHADC kila leh torti bad bret ïaki ñiut kat shaba lap ba shem kaba la wanrah iaka jingsma iwtung kaba ktah ïaka sawdong sawkun ka mariang bad kaba lah ban koit ka khiah ki nongshong shnong bad ki paidbah ba leit ba wan.

Ki nongïalam ka Seinraij Jowai bad ka Dorbar Shnong Tympang Iawmusiang kila mih ban jurip ïaki jaka pynlang ñiut ki paidbah ha Iawmusiang bad la lap ba ki ñiut kiba la lumthup na ki basa iew kila syrtap kaba la wanrah iaka jingsma iwtung kaba shyrkhei.

Halor kane ka jingbymlah ka bor district ban pynbeit ïa kane ka kam U President ka Seiñraij Jowai ma OR Challam bad u ma Edystone Shylla Waheh Shnong Dorbar Shnong Tympang Iawmusiang kila pynpaw ka jingsngewkhia bad banjur iaka ïabor district ban shimkhia ban pynbeit khnang ba wanrah iaka khuid ka suba ki iew ki hat kumjuh ki ïing briew.

“Ka Jylla jong ngi kan rakhe ïaka jingdap 50 snem, hynrei ka jinglong jingman jong ngi haduh mynta kam pat don kano kano ka jingkylla. Ka Sorkar Kmie lyngba ka Swachh Bharat Mission ban ïakhun ban pynlong ïaka ri kaba khuid kaba suba, pynban ka Jowai ka ïitkhmih jong ka West Jaintia Hills District ka dang sah shadien haka khuid ka suba bad haduh kane ka kynti kam pat ïoh iaka jaka theh kaba bit kaba biang,” la ong u ma Challam bad bynrap baka jingkhang pyrshah ban theh ha katei ka jaka kam lah ban weng iaka jingeh, hynrei kaba donkam ka dei ban don ka jingïasyllok bad shen yn khot ïaka jingïalang paidbah ha Jowai ban ïakren ïa kane ka mat.

Ula ong ba kaba lyngngoh shuh shuh ba ki ñiut kiba ju lum thup ha ki jaka kum ha khmat DC, Lad Kiang Nangbah Road ba bunsien haba ym kit ñiut ka JMB ki dap smam smam, hynrei mynta ka kynti kine ki jaka kila long kiba kylluid bad ym don satia ba bret ñiut bad kane ruh ka pynsuba jur ba ki paidbah kila bret ïaki ñiut kat shaba lap shem bad ki jaka ba kynjah kaba lah pat ban wanrah ïaka jingeh hadien habud.

U Waheh Shnong ka Tympang Ïawmusiang u Edystone Shylla ula ong, ka jingkhang jong ka 7-Shnong bad KSU War Jaintia Circle ban leit thep ñiut ha katei ka jaka pyllang ñiut ka long ka jingkhang kaba syndet syndet.

Ula ong shuh shuh “Ka jingïakhun ïaka khlam COVID-19 ruh ym pat kut, hynrei ha Jowai ngin hap ban ïakhun ban ïoh ïaka shnong kaba khuid kaba suba,” la ong u Edystone.

“Ngin hap ban ïakynduh ïa u Deputy Commissioner ka District ban kyntu ïa u ban shimkhia ban pynbeit ïa kane ka kam ban khot ïakren baroh kiba don bynta ban pynbeit ïa kane ka jingeh,” la ong u ma Edystone.