Ka jingpharep ia u Training Phawa ka long kaba bakla bym nongrim: JNC

Syllad | The Rising MeghalayaJanuary 16, 2024

Ka Jaintia National Council JNC ha u kyrwoh ba la phah da u General Secretary Jaintia National Council Central Body, u Ma Wanshwa Suting ka pynshai ha kaba iadei bad ka jingjia kaba la jia haka 03 tarik Kyllalyngkot ha kaba u Waheh Shnong ka Tuber Kmaishnong u Mikey Lyngdoh ula kynnoh ba u Training Phawa u thmu ban pyniap syndon iaki arngut ki nongialam Shnong ka Tuber Kmaishnong.

U General Secretary ula pynshai ba na ka liang ka seng kala dep tohkit bad la shem ruh ba ka jingkynthoh bad jingpharep ia u Training Phawa uba dei u Finance Secretary JNC, kam shym la ia hap satia kum kata ka jingkynthoh bad la shem ruh ba ka jingpharep ia u ka long kaba bakla bad kaba bym shongnia.

U Ma Wanshwa Suting la pynshai ba haka jingtohkit ka seng la shem ba nyngkong hi ka don ka jingshah shoh shwa kiba ha iing ha sem jong u Training Phawa bad kita kiba shah shoh, ki la phone ia u Training bad ma u ruh daka jingtieng ioh ka jia eiei, ula wan ha katei ka jaka naka bynta ban pyniakhlad ia kita kiba haiing naka jingshah shoh hynrei u shah shoh pynban bad ban lait na kata ka jingshah shoh bad ban iada ruh ialade bad ia kita kiba haiing ka la don ka jingpynphai liang, hynrei ka jingmut hi ka jong u Training kadei ban iada ialade bad ia kita kiba haiing.

Ula ong hadien kane ruh na ka liang u Training ula pan map na u Waheh Shnong ba um shym la mut satia ba kato ka jingjia kan jia da kumto. Haka step pat uwei uba la shah shoh uba kyrteng Shynna Shylla ba haka jingleit sumar (medical check up) la paw ba u la shah shoh shisha bad la don ruh ki dak mong naka jingshahshoh.

U Ma Wanshwa Suting ula pynshai ruh ha kaba iadei bad ka jingiaid rally jong ka Shnong Tuber Kmaishnong ban rai pynrem ia u Training, ula ong ba naka liang ka seng ka shem ba kane ka jingiaid rally kadei ka jingshim rai shimet jong u Waheh Shnong namar katkum ki social media, ki WhatsApp ka seng ka shem ba ka jingkhot rally ka wan na u khliehduh ka Dorbar Shnong kata u Waheh Shnong hynrei ym naka EC lane ka Dorbar Shnong.

Ula kynnoh ba kane ka jingleh jong u Waheh Shnong ka ialam bakla shi katdei eh ia u paidbah bad shim ruh iaka jingktah haka bor pyrkhat (mental harrasment) jong u Training bad ki dkhot kumjuh ki nongialam ka seng bad kane ka lah ban ialam sha ka jingjia ba sngewsih bad ka long ruh pyrshah iaka aiñ.

Shuh shuh u Suting ula kynnoh ba ka jingle jong u Waheh Shnong imat ka don kaei re kaei sha lyndet, bad ha kato ka jingiaid rally ruh la paw ka kyrteng ka seng haki placard bad banner bad kane kala ktah ym tang iaka kyrteng hynrei wat iaka burom jong ka seng bad ki nongkyrshan jong ka.

Ka seng ka phah ruh ka kyrwoh kaba shai khamtam ia u Waheh Shnong ka Tuber Kmaishnong badei ban wanrah noh ka jingsuk ka jingshngain hapoh shnong bad ban tehlakam ruh katkum ka ain ym ban iadie iathad sha ki lad pathai khubor namar ka district council ruh kala bynshet haki shnong badei ban don ka jingbishar shnong khnang ban wanrah ka jingbha ka jingmiat jong ka Shnong bad ban wanrah ruh iaka burom Jong ka Shnong.