Ka jingplie ia ka Mooriap Border Outpost kan ai jingshngain ia ki paidbah: Santa Mary

Syllad | The Rising MeghalayaApril 12, 2025

Ka jingplie ia ka Mooriap Border Outpost (BOP) ha ka shnong Mooriap kaba hap hapoh Saipung Block, East Jaintia Hills kan ai jingshngain bad iarap ban weng ia kiba bun ki jingeh bad ka jingsyier kaba ki paidbah nongshong shnong jong kane ka thain ki la mad ha kine ki phew snem kiba la leit noh, ong ka MLA ka Sutnga- Saipung ka Kong Santa Mary Shylla ha ka jingplie ia kane ka Outpost ha ka 11 tarik Iaiong.

Ha kane ka jingialang plie ia kane ka Outpost la ia don lang ruh u MDC ka Sumer u Bah K Langstang, Deputy Commissioner, East Jaintia Hills District, u Shivansh Awasthi, IAS, Superintendent of Police ka District u Giri Prasad, IPS, Public Prosecutor, EJH u Bah S Pdang, Daloi Elaka Sumer, K Mannar, ki Rangbah Shnong bad ki paidbah ka thain.

Haba pynpaw ka jingkmen halor ka jingplie ia kane ka BOP, ka MLA ka la ai khublei ia baroh kiba don bynta khamtam ia u DC bad u SP ka District halor ka jingtrei shitom ban pynurlong ia kane ka jingang ba la slem jong ki paidbah ka thain.

Ka la ong ruh ba ka jingdon ia kane ka Outpost kan wanrah ka jingshngain ia ki nongshong shnong ka thain kiba kynthup ia ka shnong Mooriap, Umkyrpong, Lakasein, Samasi, Mynthlu, Kremmyrsiang, Pala, Mynthning bad kiwei pat.

Ka Kong Santa Mary ka la banjur ruh halor ka jingkongsan ban wanrah ia ki kam pynroi bapher bapher sha ki thain kahppud da kaba bynrap ruh halor ka jingkut jingmut jong ka sorkar na ka bynta ka bha ka miat bad ka roi ka par jong ki nongshong shnong ha ki thain khappud da kaba khot ruh ia ka jingiatreilang jong baroh ki Tnad sorkar ban kyntiew ia ka bha ka miat jong ki paidbah kane ka thain.

Na ka liang u DC ha ka jingkren u la ong ba ka jingplie ia kane ka BOP ka dei ka sienjam kaba kongsan ban ioh ia ka jingshngain ha kane ka thain da kaba ai khublei kyrpang ia kane ka MLA ka thain halor ka jingbteng ban ai ka jingkyrshan halor kiba bun ki bynta kiba iadei bad ki kam pynroi kum ka jingpynioh ia ki kali kit nongpang (ambulance), ka jingshna ia ki community hall, ka jingpynioh surok bad kiwei kiwei.

U la ai khublei ruh ia ka Sorkar Jylla hapoh ka jingialam u Myntri Rangbah Conrad K Sangma halor ka jingphaikhmat sha ka Tnad pulit kaba dei ka Tnad kaba kongsan kaba trekam baroh 24 kynta bad ha kiba bun ki khep ha ki jinglong jingman kiba shem jingeh. U la pyntip ruh ïa ka jingïalang halor ka Police Infrastructure Renovation Fund (PIRF) lyngba jong ka la pynbha iaka tnad bad ula kular ban bteng ïa ka jingkyrshan ban pynbha ïa ka rukom treikam jong ki bor pulit ha ka District.

U Awasthi u la bynrap ruh ba da kane ka jingplie ia ka BOP ki paidbah ka thain kin ym donkam ban leit sha jngai halor kino kino ki mat kiba iadei bad ka jingdonkam ia ki pulit lane halor ki mat kiba sngewkhia kiba iadei bad ka shongkha khynnah da kaba banjur ruh ha ka jingialang ia ka jingdonkam ban pynlong shuh shuh ia ki jingialang pynshai paidbah halor kane ka mat da kaba kyntu ruh ia ki nongshong shnong ba ki dei ban aijingtip ia kiba kum kine ki kam bymman sha ki bor sorkar khnang ban leh ia kaba donkam katkum ka ain.

Shwa kane u SP ka District ha ka jingkren u la ong ba ka jingplie ia kane ka BOP ka long kaba kongsan haduh katta katta na ka bynta baroh ki kam shong shngain hapoh ka District, da kaba ong ruh ba ka jingdon jong kane ka Outpost kan wanrah ka jingsngew shngain hapdeng ki paidbah nongshong shnong.

Kiwei pat kiba la aijingkren ha kane ka sngi ki kynthup ia u MDC ka Sumer, Additional SP ka District u Bah S Palein bad u Rangbah Shnong ka Lakasein bad Umkyrpong.