Ka jingplie ia ka surok Them Metor kam don jingiadei bad ka jingpynkynriah ia ki Harijan: Paul

Syllad | The Rising MeghalayaNovember 6, 2024

U Myntri uba dei ruh u nongaiktien ka Sorkar u Bah Paul Lyngdoh ha ka 5 tarik u Naiwieng u la ong ba ka jingplie biang ia ka surok Them Iew Mawlong ha Them Metor kam don satia kano kano ka jingiadei bad ka rai pynkynriah ia ki 342 tylli ki longiing Harijan na kane ka jaka.

Haba kren sha ki lad pathai khubor, u Bah Paul u la niew ia ka rai jong ka Sorkar kum kaba shong nongrim namar ka jingkhapngiah ki surok iaid kali bad namar ka jingeh kaba ki paidbah ki la mad ha ka leit ka wan mynta lah palat 6 snem kynthih.

“Ngam iohi ba kan don jingiadei hapdeng katei ka jingplie ia ka surok abd ka rai pynkynriah ia ki longiing na Them Metor,” u la ong.

La plie biang ia kane ka surok ha ka 4 tarik Naiwieng ha kaba la shah iaid ia ki kali tang naduh ka por 8 baje mynstep haduh 4 baje janmiet.

Une u Myntri u la pynpaw ia kane hadien ba ki la mih ki jingpynpaw na ki Sengbhalang bad ki Seng sain pyrthei kiba la pynpaw ba kane ka jingplie biang ia kane ka surok kan nangpynjlan shuh shuh ha kaba iadei bad ka jingpynkhreh ban pynkynriah noh ia kine ki longiing napoh Them Metor.

“Ha ka jingshisha.. ha kine ki hynriew snem kiba la leit noh kiei kiei kim shym la long kiba iaid beit iaid ryntih ha kane ka jaka kaba don jingma, hynrei mynta ngi la lah ban weng ia kane da kaba ailad ia ka leit ka wan jong ki paidbah bad ki kali kumjuh na kane ka jaka kumba ju long. Kumta ka dei ka sienjam kaba kongsan ba la shim na ka bynta ban weng ia ka jingkhapngiah ha ka sorbah hi baroh kawei. Phi tip ba ka jinglong jingman ha ka leit ka wan kumba ka long mynta bad kam don satia kano kano ka jingiadei bad katei ka mat (pynkynriah) ia ki longiing,” ong u Bah Paul.

U Bah Paul u la bynrap ruh da kaba ong, “Ka Sorkar Jylla ka la iai ban na ka por sha ka por ba kan pynbeit ia kane ka kam bad ba ka don ruh ia ka jingkut jingmut kaba skhem ban pynurlong ia kane. Ka jingplie biang ia kane ka surok na Them Iew Mawlong kam don jingiadei bad ka kam pynkynriah ia ki longiing na Them Metor.”