Ka jingpynheh iaka Shillong Airport: Sa 22 akar donkam jaka, yn shim rai ka kynhun Myntri

Syllad | The Rising MeghalayaSeptember 24, 2024

Ka Sorkar Jylla ka la rai ban kyntu ia ka Sorkar Pdeng ban weng ia ki katto katne ki kyndon khnang ba kan lah ban plie lynti na ka bynta ka jingpynheh ia ka kad liengsuin Shillong Airport.

Ka kynhun Myntri ka Jylla kan sa shong jingialang ha ka 25 tarik Nailur ban ai jingmynjur na ka bynta ban thied shuh ia ka jaka kaba ha ka jingheh kaba 22 akar na ka bynta ban pynheh ia kane ka project khnang ban plielad ia ki liengsuin heh ba kin hiar hapoh Shillong Airport.

Ia kane la pyntip da u Symbud Myntri Rangbah ka Jylla u Bah Sniawbhalang Dhar hadien ka jingleit jurip ia ka Shillong Airport ha ka 23 tarik Nailur. U Bah Sniawbhalang u la pynlong ruh ia ka jingialang bad ki heh na ka Tnad Civil Aviation Ministry bad Airport Authority of India. Kiba la iadonlang ki kynthup ruh ia u Chief Secretary, u Commissioner & Secretary ka Tnad Transport bad ki Heh Ophisar jong ka Tnad.

“Na ka liang ka Sorkar ka la shimkhia bha na ka bynta ka jingpynheh ia ka Shillong Airport,” ong u Symbud Myntri Rangbah haba kren sha ki lad pathai khubor hadien ka jingialang.

“Ngi la ioh pdiang ia ka kaiphod kaba ar na ka Airport Authority of India (AAI), kaba la pynpaw ba ka lad ka don na ka bynta ban pyniar ia ka runway jong ka kad liengsuin, hynrei ki don pat katto katne ki jingwit kiba donkam ban iakren bad ka Sorkar India shwa ban pyniaid shakhmat ia ka project pynheh ia kane ka kad liensuin,” u la bynrap da kaba ong, “Kine ki ia tyngkhuh bad ki katto katne ki kyndon ha kaba ngi donkam ia ka Sorkar India ba kan pyllait khnang ba ngin lah ban wanrah ia ki liengsuin heh ba kin hiar hapoh Shillong Airport.”

Haba kylli, u Bah Sniawbhalang u la ong,” Lada ka Sorkar India kam pyllait na kine ki kyndon, ka jinglut kan dei kaba bun bah, hynrei lada ka pyllait ngin lah ban pynheh ia kane ka kad liengsuin tang hapoh ki khyndiat snem naduh mynta.”

“Nalor kata katkum ka jingleh sorbe kaba dang shen, ngi kwah ban kiar na ka jaka lum khnang ba ngin lah ban pynheh ia ka runway -900 mitar hapoh ka jaka lajong.Hynrei lada hap ban mait ia u lum ka jinglut kan kot haduh palat T.8000 klur. Hynrei, ki don katto katne ki kyndon, ngin sa kyrpad ia ka Sorkar India ba kan pyllait noh ia ki khnang ban plie lynti na ka bynta ka jingpynheh ia ka runway jong kane ka kad liengsuin,” u la bynrap.

Nalor kata une u Symbud Myntri u pyntip ruh ba ka Sorkar ka donkam ban thied jaka sa kumba 22 akar na ka bynta ka jingpyniar ia kane ka project ha kaba 16 akar ka long na ka bynta ka jingshngain ka kad liengsuin bad 6 akar ban pynieng ia ki liengsuin kiba heh.

U la ong ruh ba halor kane kin sa shong jingialang ka kynhun Myntri ha ka 25 tarik Nailur ban ai jingmynjur ia ka jingtyrwa ban pyniaid shakhmat ia ki kam bad ka Sorkar India.

Ha kaba iadei bad ka jingkylli, u Bah Sniawbhalang u la ong, “Katkum ka jingthmu, haduh palat ne duna T.500 klur yn pynlut da ka AAI katba ia ka jingthied jaka yn pynlut da ka sorkar Jylla.”

Shuh shuh u la ong,” “Lada pyndep lut ia kine, ka kad liengsuin kan sa treikam 24X7 bad ka lah ban iarap ban pynioh kam ioh jam ia kumba 300 haduh 400 ngut ki briew.”