Ka jingpynkupbor iaka lawei ki khynnah: Lehkmen ka Halari LP&UP School iaka jingjop ki khynnah haka certificate course MS Office

Syllad | The Rising MeghalayaDecember 12, 2024

Ka Halari LP & UP School, Nangbah haka 11 tarik Nohprah kala lehkmen lang bad ki khynnah skul jong ka kiba la pyndep iaka MS Office Certificate Course ban pynkupbor iaka lawei jong ki da ka jingtip jingnang iaka kor computer.

Kane ka jingai jinghikai short term course kan long ka sien kaba nyngkong kaba la pynlong da kane ka skul ha ka thain Nangbah, West Jaintia Hills District.

Ha kane ka sngi la donlang ka kongsan ka SDSEO West Jaiñtia Hills, ka Kong AP Syiem, ka symbud konsgan ka BMC Thadlaskein Block Kong C. Lyngdoh, u Director ka JIT Jowai B. Marweiñ, u Dolloi ka Elaka Nangbah M. Garod, ki kmie ki kpa, ki nonghikai bad khynnah skul.

Ka Kong AP Syiem haka jingkren kala iaroh iaka jinglah jong ka skul ban wanrah ia kane ka course bad kala kyntu iaka SMC kumjuh ki nonghikai ban ialeh katba lah ban wanrah ia kiwei de ki jingmyntoi ka skul. Nalor kata kala kyntu ruh iaki nonghikai ban shimkhia iaka kamram namar ki nonghikai kidei ki nongsaindur iaka lawei jong ki khynnah.

Katba ka symbud kongsan Kong C Lyngdoh kala pynpaw ka jingkmen bad ong ba hapoh ka District kane ka skul kadei kaba nyngkong ban wanrah iaka Short term course.

U Dolloi ka Elaka Nangbah M. Garod ula kyntu iaki nonghikai ban aiti bad sei iaka buit ka bor sha ki khynnah skul.

Naka liang ka skul lyngba u Principal H Thubru ka aikhublei iaki nonghikai computer jong ka skul kiba la hikai iaki khynnah halor ka Ms Office Course bad ioh pdiang ruh iaki Certificate na ka Jaintia Institute of Technology (JIT) Jowai.