Ka jingpynshai ka BSF Meghalaya halor ka jingjia ha khappud West Jaintia Hills
Na ka liang ka Tnat shipai Border Security Force (BSF), Meghalaya ka la pynpaw ba ka jingjia kaba la jia ha ka 11 tarik mynta u bnai ha ka por 12:05 shiteng sngi ha ka thain khappud ka West Jaintia Hills ka dei na ka jingsngewthuh bakla.
Lyngba une u kyrwoh ka BSF ka la pynksan bad pynshai ba ki BSF kiba don ha ka thain khappud India bad Bangladesh ha Hawaitila ki la iohi ia uwei u briew uba iaid lynti sha Lakroh Nala, kaba iajan bha bad ka khappud bad ka ri Bangladesh. Kumta haba ki shipai BSF ki la pynsangeh ia u, u la pynpaw ka jingbym sngewtynnad ia kane kajingjia bad u la shim ia kane kum ka jingktah ia ka burom shimet jong u namar ua la kam ba u dei u doktor Veterinary ha ka thain.
La ong ruh ba haba u la shah pynsangeh ha ki shipai BSF, u la sdang ban ring video ia ka thain khappud bad ia ki shipai BSF kiba don ha ka kam. Kumta hapdeng ki jingkyrpad jong ki shipai BSF ban sangeh ka jingringdur, hynrei une u briew um shym la sngap ia ka jingkyrpad jong ki.
Hadien kane la ong ba utei u doktor veterinary u la mih noh na kane ka jaka da kaba byrngem tyngeh ruh ia ki shipai BSF ba don hapdeng ka kam. Hadien katto katne por, u la wanphai ryngkat bad katto katne ki nongshong shnong, bad hylla pyrshah ia ki shipai BSF bad ring video ban pynjah burom ia ka kynhun shipai.
La ong ruh ba ka jingkynnoh jong utei u briew ba ki shipai BSF ki la byrngem ban siat ia u bad pynlaw lyngkhuit ia u kalong ka bym don nongrim bad kaba ialam bakla pyrshah ia ki shipai BSF.
Ki shipai BSF kiba don ha thain khappud ki iada ia ki paidbah kiba sah hajan ki jaka khappud. Kum kine ki jingkynnoh bym don nongrim ym tangba ki buh jingma ia ki shipai kiba trei ha ki jinglong jingman ba jynjar, hynrei ka wanrah ruh ia ki jingiakynad kaba lah ban ia kiar. Ki jingkynnoh pyrshah ia ka Border Security Force kilong ki bym don nongrim, ong ka tnat shipai.
Ha kaba iadei bad kane ka jingjia ka tnat shipai BSF ka la ong ba ha ka 12 tarik Rymphang 2024 ha ka por kumba 4 baje janmiet la pynlong ia ka jingialang ha ophis SDO (Civil) Amalarem ba la pyniaid da u Dr Abhishek Saini, IAS ryngkat u SDPO Amlarem Sub- Division, Dr Seiboklang Buam, SHO PS- Muktapur bad ki heh shipai BSF. Ha kane ka jingialang la pyni ia ki jingshisha jong kane ka jingjia (kiba la pynpulom lut ia kine ki jingkynnoh) bad kumta la pynbeit ia kane ka kam.
La ong ruh ba ha katei kajuh ka sngi ha ka por kumba 5 baje janmiet la pynlong sa kawei ka jingialang, ha kaba la iadonlang u MLA ka thain, u Bah Lahkmen Rymbui, Chief Advisor sha ka Sorkar Meghalaya, Additional Home Secretary Sorkar Meghalaya, IG Law & Order (Meghalaya Police), IG Border bad IG BSF Meghalaya ban iakren halor kane ka jingjia.
U Inspector General of BSF Meghalaya, hadien ba u la pynpaw ia ki jingshisha shaphang kane ka jingjia, u la kular ha ka jingialang ba ka BSF ka ieng skhem na ka bynta ka jingshngain jong ka ri wat hapdeng ki jingeh. U la ong ruh ba ki shipai BSF ki ai ka jingshakri na ka bynta ka ri.
Facebook
Instagram
Youtube
Twitter
Leave a Reply