Ka jingpyrshah Sorkar kan ym ktah ia ka jingkyrmen ka NPP ha ka elekshon MDC sha ki ADC: Sniawbhalang

Syllad | The Rising MeghalayaJanuary 9, 2025

U National General Secretary ka National People’s Party (NPP) uba dei ruh u Symbud Myntri Rangbah ka Jylla, u Bah Sniawbhalang Dhar ha ka 8 tarik Kyllalyngkot u la ong ba ki kam pyrshah bad isih sorkar kan ym ktah satia ia ka party ha ka elekshon ka ban wan sha ka elekshon MDC ka ban wan sha ka Khasi Hills Autonomous District Council (KHADC) bad Jaintia Hills Autonomous District Council (JHADC) ka ban long ha ka 21 tarik u Rymphang.

Kane ka jingpynpaw ka jong u ka long ruh hadien ba ka la mih ka jingkynnoh ha kaba iadei bad ka jingshim rai ba dang shen jong u MDC ka Mawlai u Bah Teiborlang Pathaw ban mih noh na ka party hashwa jong ka elekshon.

Haba kylli, u Bah Sniawbha u la ong, “Em wat kylli ia nga, ka shong ha ki MDC. Ngin ai ka jingiakhun kaba itynnad ha kane ka elekshon ka ban wan. Kum ka party ngi long kiba la pynkhreh ban leit sha ka elekshon bad ngi kyrmen ba ngin jop bun.”

Nalor kata u la ong ruh ba kam don satia kano kano ka jingialeh pyrshah ne isih sorkar ka ban treikam pyrshah ia ka NPP. “Watla ka la don makna, hynrei ngin hap ban trei shitom, u la bynrap.

Na ka liang u Symbud Myntri Rangbah u la kam ba ki don bun bah ki briew kiba kwah ban iakhun na ka NPP ha kane ka elekshon bad ong, “Ki don kiba kwah ban mih bad ki don ruh kiba kwah ban wan, kane ka dei kaba ju jia ha ka por elekshon.

Da kaba pynpaw ba ka VPP kam dei satia ka jingma ia ka NPP, u Bah Sniawbha u la ong, “Em ki (VPP) kim dei ka jingma ia ka NPP namar ka don ka jingiapher na kawei ka constituency sha kawei pat. Kam dei ka juh ka formula kam dei ka juh ka rukom long.”

“Ka jingkhmih lynti ka jong ngi ka long ba ngin thaw hi ia ki Executive Committee ha baroh ki artylli ki ADC, kata ha Khasi bad Jaintia Hills,” u la ong.