Ka jingpyrshang u Bah Ardent ban pynduh ia ki ADC ka dei ka jingthmu ban tep im ia ka jaidbynriew: Dhar

Syllad | The Rising MeghalayaApril 7, 2024

U National General Secretary ka Seng NPP uba dei ruh u Symbud Myntri Rangbah ka Jylla u Sniawbhalang Dhar haka 6 tarik Iaiong, u la ther tyngeh ia u president jong ka Voice of the People Party (VPP) u Bah Ardent Miller Basaiawmoit halor ka jingwanrah ia ka resolution ban pynduh pyndam noh ia ki Autonomous District Councils (ADCs) ha ka por ba u dang bat kum u CEM ka Khasi Hills Autonomous District Council (KHADC).

“Ka jingthmu jong u Bah Ardent ha kaba wanrah ia ka resolution ban pynduh noh ia ki ADC ha ka por ba u dang bat kum u CEM ka dei ka jingthmu ban tep im ia ka jaidbynriew. Hynrei, ka long kaba donbok ngi dang don ia ki nongialam kiba pyrshah ia kane ka jingthmu bad U Blei um shym la ailad ban jia kano kano kaba sngewsih ia ki nongshong shnong Khasi Pnar,” ong u Dhar.

Haba kren ha ka jingialap ilekshon ban pan jingkyrshan ia ka kyrtong ka NPP ka Kong Ampareen Lyngdoh ha ka jingialang ha Mawryngkneng, East Khasi Hills, u Myntri u la kynnoh ruh ba u president ka VPP u la pyrshang ruh wat ban pynduh syndon ia ka jingai jait kmie da kaba pynshlur ban shim jait na u kpa.

“Ki (VPP) ki kwah ban pynduh jait ia ka jaidbynriew da kaba pynkylla ia ka jait ka khong jong ka kmie sha u kpa, hynrei hato ki paidbah kin ia mynjur bad ailad ia kane? Ki la pynpaw ba ki ieit ia ka jaidbynriew hynrei ki kwah pat ban bujli ia ka dustur aijait kmie sha ka jaid kpa, kata ia kaba ju leh da ki briew kiba dei na kiwei pat ki kynhun jaidbynriew,” u la ong.

U la ong ruh ba u president ka VPP ha kiba bun ki jingialang u la kam ba u la noh synniang shibun sha ka jaidbynriew, hynrei ka jingnoh synniang kaba khraw tam ka dei halor ka jingiuhroit ia ki nongrep da kaba wanrah ia ka jingot kilo ia ki mar rep.

Nalor kata haba kynthoh ia ka VPP halor ka jingpynbiej ia ki paidbah tang ban khring vote, u Dhar u la ong, “Ngim shym la wan hangne ban pynbiej briew hynrei ban pynsngewthuh ia ki ym kumba long kiwei pat ki party kiba thok bad shukor ia ki paidbah ka jylla tang na ka bynta ban ioh vote.

“Ki tymmen ki san ki ju ong ba ki don bunjait ki nongialam, ki don ki nongialam sain pyrthei, ki don ki nongialam niam, ki nongialam shnong bad kiwei pat, hynrei kaei kaba kongsan hangne ka long ban burom ia lade bad burom ia kiwei. Ieit ia lade hynrei wat isih ia kiwei. Hynrei, ka long kaba sngew bynniaw namar ki don ki party sain pyrthei khamtam ha kane ka jingialap ilekshon namar kim don shuh ia ka jinglehrain ne ka jingburom, ki tharai ba ki dei ki angel bad baroh ki briew ki dei ki nongpop,” u la bynrap.

U la kam ruh ba kiba bun ki briew mynta ki la babe ba ki la ai ia ki vote jong ki tang namar ba sngew ieit palat ia ka jingrwai ilekshon jong ka party.

“Dei na kata ka daw lada phi ieit ia ka jaidbynriew, phi dei ban pynshisha lyngba ki jingleh jingkam jong phi. Ngi dei ki nongmihkhmat ba jied da u paidbah, bad ngi la shah jied ban ban aijingshakri na ka bynta san snem. Phim shym la jied ia ngi ban shu shong klikti ha Secretariat lane ha District Council. Ngi dei ki shakri jong phi, ngim lah ban shu shim tulop khlem da trei. Kum ka nuksa u Bah Pyniaid Sing Syiem u la long MLA na ka bynta shi snem shiteng ha ka ilekshon shiteng samoi, ngi la pynioh ia ki skhim bapher bapher, hynrei sniewbok ba ha ka ilekshon 2023 ia ka vote phi la ai sha u briew uba shu pynbiej ia ki paidbah,” ong u Dhar.

Da kaba ong ba ka don ka jingiapher kaba khraw hapdeng ka VPP bad ka NPP, u Symbud Myntri Rangbah u la ong, “Ka VPP ka mut Voice of the Pynbiej Paidbah” party, hynrei  NPP k mut  ‘Nang Pynphuh Pynphieng ia u  Paidbah.

Nalor kata haba aijingiarap ia ka jingshim rai jong ka BJP ban kyrshan ia ka NPP, u Dhar u la ong, “Tang namar ba ngi iatreilang bad ka BJP, kam mut ngi long kumjuh, ngi don la ki jong ki mat treikam. Kam mut ruh tang namar ba phi vote ia nga, phi lah ban shim ia ka Kur Dhar. Lada phi vote ia ka Kong Ampareen, yn ym kyntu ia phi ba pynkylla ia ka kur jong phi sha ka Lyngdoh. Hynrei, peit ia ka jingstad jong u Myntri Rangbahduh. U la ong ba kin kyrshan ia ka sorkar MDA namar ki jingtreikam ki jong ka.

Ha kaba iadei bad ki jingkynthoh ia ka NPP halor ka jingpynlong ia ki jingialang ha ki sngi U Blei, u Dhar u la ong, “Ngin hap ban burom ia ka jingsngew jong u paidbah. Don ki paidbah kiba kwah ia ngi ba ngin pynlong jingialang ha kiba kum kine ki sngi. Lashai, Nga don jingialang ha Jhalupara namar na ka liang ki paidbah ki la kyrpad, kumta Nga dei ban burom ia ka jingsngew jong ki. Kane ka dei ka kamram jong u nongialam. Ki nongialam kim lah ban khein poi iano iano ruh. Ngi don hangne na ka bynta ka jingpyniaid beit ia ki kam ki jam.”

Shuh shuh u Dhar u la ong ruh ba wat hapdeng kiba bun ki jingkynthoh pyrshah ia ka sorkar, hynrei ka sorkar NPP hapoh ka jingialam jong u Conrad K Sangma bad u Bah Prestone Tynsong ka la iaid ha ka lynti kaba dei.

“Hadien ba la shimti ia ka sokar MDA ha u snem 2018, uwei na ki nongialam sain pyrthei u la pynpaw bad kane ka dei tang ka sorkar ba shipor ne adhoc bad shen kan sa khyllem noh, hynrei kane ka sorkar adhoc ka la kylla long ka sorkar kaba neh bad skhem, haduh 6 snem, bad ka daw ka long namar ka trei na ka bynta ka bha ka miat bad ka bit ka biang jong u paidbah.” ong shuh shuh u nongialam ka NPP.